„უჩინმაჩინის ქუდი“ 10 წლის შემდეგ

კულტურა - 15:25, 15 Dec, 2016

1908

„უჩინ-მაჩინის ქუდი“ სიცოცხლეს აზერბაიჯანული თეატრის სცენაზე დაიბრუნებს .
თეატრმა, ხანგრძლივი პაუზის შემდეგ, დედაქალაქის ისტორიულ უბანში-აბანოთუბანში 2004 წლიდან განაახლა ფუნქციონირება და იქ ახალ დადგმებთან ერთად, ძველი სპექტაკლების აღდგენაზეც მუშაობენ.
სულ მალე კი გ. ერისთავის „უჩინ-მაჩინის ქუდის“ პრემიერაზე უმასპინძლებენ მაყურებელს, რომელიც თითქმის 10 წელია დასს აღარ უთამაშია.
„უჩინ-მაჩინის ქუდი“ მაყურებლისთვის აზერბაიჯანულ ენაზე იქნება წარმოდგენილი და სპექტაკლში მხოლოდ ამ თეატრის მსახიობები მიიღებენ მონაწილეობას. სპექტაკლის რეჟისორია ვარლამ (ლალი) ნიკოლაძე.
პრემიერა 23 დეკემბერს, აკ. ხორავას სახელობის მსახიობის სახლის (საქართველოს თეატრალური საზოგადოება) სცენაზე გაიმართება და თბილისის აზერბაიჯანული სახელმწიფო პროფესიული დრამატული თეატრის მსახიობებიც-ლეილა კასუმოვა, შეილა ჯაფაროვა, ფაზილ ბაირამოვი, ბინალი აკიპოვი, იზაბელა ალიევა და აისელ მამედოვა მაყურებელს იქ უმასპინძლებენ.
„ავარიული შენობის გამო მაყურებელს თეატრის ფაქტობრივ მისამართზე ვერ ვუმასპინძლებთ, რადგან არ გვაქვს დარბაზი და სცენა, სადაც მსახიობები ითამაშებენ და მანამ, სანამ ჩვენი თეატრი გარემონტდება და კეთილმოეწყობა, თბილისის სახვადასხვა თეატრებში ვმასპინძლობთ მაყურებელს. ჩვენი დასის მიერ აკ. ხორავას მსახიობის სახლის სცენაზე წარმოდგენილი არაერთი პრემიერა ახსოვს აზერბაიჯანული თეატრის გულშემატკივარს, მათ ამჯერადაც იქ ველოდებით“- განაცხადეს თეატრის პრესსამსახურში.

სპექტაკლი, რომელიც ცნობილი ქართველი დრამატურგის გიორგი ერისთავის პიესის მიხედვითაა შექმნილი, დედაქალაქის პროფესიულ თეატრალურ სივრცეში ნახევარსაუკუნოვანი პაუზის, აზერბაიჯანული თეატრის სცენაზე და რეპერტუარში კი 10 წლიანი შესვენების შემდეგ კვლავ დაბრუნდება. გ. ერისთავმა ერთ-ერთმა პირველმა დაუდო სათავე ქართულ კრიტიკულ რეალიზმს, მტკიცე საფუძველი ჩაუყარა კომედიოგრაფიას, დააარსა ქართული პროფესიული თეატრი, რომელსაც1850-1854 წლებში ხელმძღვანელობდა. იყო უდიდესი კულტურული წამოწყების ინიციატორი: პირველი ქართული სალიტერატურო ჟურნალი "ცისკარის" დამაარსებელი და რედაქტორი.