საგარეო უწყების ყოფილი თანამშრომელი ღამეს კანცელარიასთან ათენებს და შიმშილობის დაწყებას გეგმავს

საზოგადოება - 17:12, 12 Dec, 2016

7233

საგარეო საქმეთა სამინისტროს ყოფილი თანამშრომელი უწყებიდან მის გათავისუფლებას აპროტესტებს. ნიკა ჩერქეზიშვილმა პროტესტის ნიშნად ღამე მთავრობის ადმინისტრაციასთან გაატარა და ამ დრომდე იქ რჩება, ის პრემიერ კვირიკაშვილთან შეხვედრას ითხოვს. მისი თქმით ის ორი წლის წინ, საგარეო საქმეთა სამინისტროს, შესყიდვების დეპარტამენტის ხელმძღვანელის თანამდებობიდან უკანონოდ გაათავისუფლეს, მიზეზად კი არაკვალიფიციურობა დაუსახელეს. ჩერქეზიშვილმა სასამართლოსაც მიმართა თუმცა ორწლიანი განხილვების შემდეგ ის გაამტყუნეს. ჩერქეზიშვილი გადაწყვეტილების გასაჩივრებას სააპელაციო სასამართლოში გეგმავს.

ჩერქეზიშვილს 3 მოთხოვნა აქვს:

1. აღადგინონ ნიკა ჩერქეზიშვილი საგარეო საქმეთა სამინისტროს სახელმწიფო შესყიდვების უზრუნველყოფის სამსახურის უფროსად!

2. შეხვდეს გიორგი კვირიკაშვილი, რომელსაც ნიკას გათავისუფლების დროს ეკავა საგარეო საქმეთა მინისტრის თანამდებობა!

3. საჯარო სამსახურებში კადრების დანიშვნა ხდებოდეს უფრო სამართლიანად და გამჭვირვალედ. პრიორიტეტი გახდეს კვალიფიკაცია და არა ნეპოტიზმი.

მოთხოვნების დაუკმაყოფილებლობის შემთხვევაში ის შიმშილობის დაწყებას გეგმავს.

ნიკა ჩერქეზიშვილს დღს მთავრობის ადმინისტრაციის იურისტები შეხვდნენ და საქმის ვითარებაში გარკვევას დაპირდნენ.

დღეს 19:00 საათზე, ნიკა ჩერქეზიშვილისადმი სოლიდარობის გამოხატვის მიზნით კანცელარიასთან აქციაც იგეგმება.