პერინატალური რეგიონალიზაციის საკოორდინაციო საბჭოს მიერ 16 სამშობიარო კლინიკას დონეები განესაზღვრა. დაწესებულებების ხელმძღვანელებს კი ამის დამადასტურებელი სერტიფიკატები გადაეცათ. აღნიშნული პროცესი სამედიცინო მომსახურების ხარისხის გაუმჯობესების ინსტრუმენტია და სამშობიარო კლინიკების შეფასებას გულისხმობს.

დონის განსაზღვრის შემდეგ, სამედიცინო დაწესებულება პაციენტს კომპეტენციის შესაბამის სერვისს მიაწვდის. სისტემა ორსული ქალების, დედებისა და ახალშობილებისათვის სათანადო დონის სერვისების მიწოდებას მშობიარობამდე, მშობიარობის დროს და მშობიარობის შემდგომ პერიოდში უზრუნველყოფს.

სამშობიარო კლინიკების დონეების განსაზღვრის მიზნით, ჯანდაცვის სამინისტრომ მონიტორინგის მექანიზმი და ინდიკატორები შეიმუშავა. თითოეული შემთხვევა პაციენტის ექიმთან კონტაქტის წუთიდან შეისწავლება.

„თითოეული გარდაცვალების და სიკვდილ-სიცოცხლის მიჯნაზე მყოფი შემთხვევა პაციენტის ექიმთან შეხების წუთიდან შეისწავლება. პაციენტი შესაბამის ადგილას, შესაბამის დროს, კვალიფიციურ დახმარებას მიიღებს, რაც დედათა და ბავშვთა სიკვდილობას შეამცირებს“,- აცხადებენ ჯანდაცვის სამინისტროში.

რეგიონალიზაციის პროცესი წელიწადზე მეტია დაიწყო. დონეების განსაზღვრა მთელი ქვეყნის მასშტაბით მიმდინარეობს და პროცესი 2017 წლის ბოლომდე დასრულდება.

პერინატალური რეგიონალიზაცია, როგორც სამედიცინო მომსახურების სახელმწიფო სტანდარტი, ამერიკის შეერთებული შტატებისა და ევროპის განვითარებულ ქვეყნებში უკვე მოქმედებს.