ავტომანქანებზე აქციზის გაზრდას ავტომფლობელები და დილერი კომპანიის წარმომადგენლები აპროტესტებენ

საზოგადოება - 15:38, 10 Dec, 2016

6591

ავტომანქანებზე აქციზის განაკვეთის ზრდას აპროტესტებენ ავტომფლობელები და ავტომობილების დილერი კომპანიის წარმომადგენლები. დიღომში, ოლიმპიური არენის მიმდებარე ტერიტორიაზე გამართული აქციის მონაწილეების მიიჩნევენ, რომ აქციზის გაზრდა მოქალაქეებისთვის მომსახურების გაძვირებას გამოიწვევს, რაც მოსახლეობას მძიმე ტვირთად დააწვება.

საპროტესტო აქციას ასევე უერთდხება არასამთავრობო ორგანიზაცია „ეკოტრანსპორტ ცენტრი“.

ვასო ურუშაძის განცხადებით, ახალი საგადასახადო რეგულაციები არანაირ კავშირი არაა მოძრაობის უსაფრთხოებასთან და ეკოლოგიური მდგომარეობის გაუმჯობესებასთან.

,,მთავრობის მიერ შემოთავაზებულ საგადასახადო რეგულაციებს არანაირი კავშირი არა აქვს არც მოძრაობის უსაფრთხოებასთან და არც ეკოლოგიური მდგომარეობის გაუმჯობესებასთან და ყველა ეს დასახელებული არგუმენტი არის ტყუილი და მიზნად ისახავს საზოგადოების შეცდომაში შეყვანას.

ყოველგვარ ლოგიკას არის მოკლებული არგუმენტი, რომ დასახელებული რეგულაციები გამოიწვევს ავტოპარკის განახლებას, ავტოპარკის განახლება პირდაპირ კავშირშია ქვეყნის ეკონომიკურ განვითარებასთან, როცა იზრდება მოსახლეობის ფინანსური შემოსავლები, ისინი ბუნებრივად ცდილობენ განაახლონ პირადი მოხმარების ნივთები, როგორიც არის ავტომობილი, შესაბამისად რეგულაციებითა და მთავრობის მხრიდან ხელოვნური ჩარევით ავტოპარკის განახლება შეუძლებელია.

ტყუილია ასევე ისიც, რომ აღნიშნული საგადასახადო რეგულაციები ავტოპარკის განახლებასთან ერთად შეამცირებენ ტექნიკურად გაუმართავი ავტომობილების რაოდენობას ქვეყანაში, რომლებიც თურმე ხშირ შემთხვევაში ხდებიან ავტოსაგზაო შემთხვევების გამომწვევი მიზეზი. შსს-ს ოფიციალურ სტატისტიკაში, ავტოსაგზაო შემთხვევების შესახებ, არც ერთი შემთხვევის გამომწვევ მიზეზად არ ფიქსირდება ავტომობილის ტექნიკური გაუმართაობა“, - განაცხადა „ეკოტრანსპორტ ცენტრის“ ხელმძღვანელმა ვასო ურუშაძემ.