,,კაცი ცუდად გახდა და ნიჩბებით ვწმინდეთ გზა“ – ჩოხატაურის სოფლებში თოვლის საფარი 2 მეტრს აღწევს

საზოგადოება - 15:08, 09 Dec, 2016

5731

ჩოხატაურის სოფლებში, ქვაბღა, ჩხაკაურასა და ზოტში თოვლის საფარმა ორ მეტრს მიაღწია. ჩოხატაურის გამგეობაში გვეუბნებიან, რომ გზები ინტენსიურად იწმინდება და ორხიდიანი მანქანებისთვის გადაადგილების პრობლემა არ შექმნილა.

ადგილობრივები კი, სწორედ გადაადგილების დროს არსებული შეფერხებების გამო შექმნილ პრობლემაზე საუბრობენ.

"გურიის მოამბეს" ჩხაკაურად აცნობეს, რომ გუშინ, გაუწმენდავი გზების გამო ავადმყოფის საავადმყოფომდე ჩაყვანა რამდენიმე საათის განმავლობაში ვერ შეძლეს, რადგან მოსახლეობა საკუთარი ძალებით ცდილობდა სამანქანო გზის გაჭრას:

"ერთ-ერთ ოჯახში კაცი გახდა ცუდად, აუცილებელი იყო გადაგვეყვანა საავადმყოფოში, მაგრამ გზა იყო გაუწმენდავი და რამდენიმე საათი ნიჩბებით ჩვენი ძალებით მოგვიხდა მისი გაწმენდა. ძვლივს ჩამოვიყვანეთ ავადმყოფი ცენტრამდე".

ჩხაკაურელების პროტესტს არ ეთანხმება გამგებელი ირაკლი კუჭავა, რომელიც გვეუბნება, რომ გზებზე თოვლი დღეში რამდენჯერმე იწმინდება და გადაადგილების პრობლემა არც ერთი მიმართულბით არ არსებობს:

„ორჯერ გაიწმინდა აღნიშნული გზის მონაკვეთი და მთელი დღის განმვლობაში მიმდინარეობდა გზების გაწმენდა ყველა სოფლის მიმართულებით, შეფერხებები არ ყოფილა. ერთი დღეც არ შეწყვეტილა გზაზე მოძრაობა ორხიდიანი მანქანებისთვის. მიუხედავად ამისა, თოვლის საფარმა თითქმის ორ მეტრს მიაღწია. პაციენტი რომელიც ცუდად გახდა, მასთან ექიმი ექიმი ორჯერ მივიდა.“ - განუცხადა „გურიის მოამბეს“ ჩოხატაურის მუნიციპალიტეტის გამგებელმა, ირაკლი კუჭავამ.

გამგებლის განცხადებით, მაღალმთიანი სოფლის მოსახლეობას, მიუხედავად დიდთოვლობისა, პრობლემები არ შექმიათ ელექტროენერგიის მიწოდებასთან დაკავშირებითაც.