მეუფე იოსები დაფინანსებასთან დაკავშირებით ოზურგეთის მერის განცხადებას ეხმაურება

საზოგადოება - 15:04, 08 Dec, 2016

2936

შემოქმედის ეპარქიის მიტროპოლიტი მეუფე იოსები ეპარქიის მიერ თანხების არამიზნობრივ ხარჯვასთან დაკავშირებით ქალაქ ოზურგეთის მერის განცხადებას ეხმაურება:

„გვსურს გამოვეხმაუროთ ქალაქის მერის განცხადებებს და ეპარქიისადმი ადგილობრივი თვითმართველობის მიერ გაღებული ფინანსური დახმარების საკითხს.

ნებისმიერი შემოწირულობა, დაფინანსება და მიზნობრივი დახმარება მოხმარდა და ხმარდება ეკლესია-მონასტრების მშენებლობას და განვითარებას;

დაფინანსება, რომელსაც ქალაქის მერია გამოყოფს, არასოდეს ყოფილა წელიწადში 55 000 (ორმოცდათხუთმეტიათასი) ლარზე მეტი, ხოლო 2016 წელს გაცილებით ნაკლები - 25 000 (ოცდახუთიათას) ლარს შეადგენდა;

ტაძრის ქტიტორები და მშენებლები კარგად უწყიან, რომ აღნიშნული დაფინანსება ერთი მცირე ტაძრის მშენებლობისათვისაც კი არ არის საკმარისი;

ეპარქია საკუთარი მეურნეობის და საეკლესიო შემოწირულობებიდან ეხმარება საციალურად შეჭირვებულ ადამიანებს საკვებით, მედიკამენტებით და სხვა;

მზადყოფნას გამოვთქვამთ, ხელისუფლების წარმომადგენლებთან და ფინანსისტებთან ერთად, დეტალურად განვიხილოთ მერიის მხრიდან გამოყოფილი თანხის ხარჯვითი ნაწილი და ანგარიში; ასევე მზადყოფნას გამოვთქვამთ, შევთანხმდეთ სამომავლოდ, ანგარიშვალდებულების ნებისმიერ მისაღებ მექანიზმზე.

ჩვენ ვლოცულობთ მრევლისთვის, მთავრობისა და მხედრობისათვის, მათ შორის ქალაქის მერის და მისი თანამშრომლების სულიერი და ფიზიკური კეთილდღეობისათვის.“- აღნიშნულია განცხადებაში.