7 აქტივისტი ქალის ისტორიის მიხედვით , რომლებმაც საკუთარი ცხოვრება გენდერული ნიშნით ჩაგვრის, დისკრიმინაციისა და უსამართლობის წინააღმდეგ ბრძოლას მიუძღვნეს მარჯანიშვილის თეატრში სპექტაკლი დაიდგა. პირველი სპექტაკლი 25 ნოემბერს შედგა და მასში 7 ცნობილი ქართველი ქალი იღებდა მონაწილეობას, უფლებადამცველი ქალების ისტორიას კითხულობდნენ მაკა ჩიჩუა – მსახიობი და მხატვარი, საქართველოს პირველი ლედი; ხათუნა სამნიძე – რესპუბლიკური პარტიის თავმჯდომარე; თამარ გურჩიანი – იურისტი; ნინა სუბლატი – მომღერალი; ნანა ექვთიმიშვილი – რეჟისორი და მწერალი; ანა გოგუაძე – ფოტოგრაფი; და ნესტან კვინიკაძე – სცენარისტი და ჟურნალისტი.

მეორე სპექტაკლი 7 დეკემბერს გაიმართა, ამჯერად თანასწორობისთვის მებრძოლი ქალების ისტორიებს შვიდი მამაკაცი - შვიდი ელჩი კითხულობდა.

გამართული სპექტაკლები პროექტ “შვიდის” ნაწილია, რომელიც ოთხჯერ განხორციელდება საქართველოში. აღნიშნული პროექტი საქართველოში ინიცირებულია ევროკავშირის სადამკვირვებლო მისიისა და საქართველოს ქალთა ფონდის მიერ, რომელსაც მხარდაჭერა აღმოუჩინა შვედურმა ინსტიტუტმა და შვედეთის საელჩომ.

სპექტაკლის ფოტოებს სოციალურ ქსელში საქართველოს პარლამენტის წევრი ელენე ხოშტარია ავრცელებს.