როგორც "ნიუპოსტს" ზაუტაშვილმა განუცხადა, ის კონკურსში მონაწილეობას აუცილებლად მიიღებს. რაც შეეხება კითხვას, კონკრეტულად ვინ მოქმედებს მის წინააღმდეგ, ტელეწამყვანი ამბობს, რომ ამ ეტაპზე კონკრეტული გვარ-სახელების დასახელებისგან თავს იკავებს.

"არიან ალბათ, ასეთი მონდომებული ადამიანები, მე შეგნებულად არავის დავასახელებ იმიტომ, რომ ამას თავისთავად დრო გამოავლენს. მაქსიმალურად ცდილობენ, რომ მოარული ხმები და ჭორები გაავრცელონ, თითქოს მე შესაბამისი საბუთები არ მაქვს იმისთვის, რომ კონკურსში მონაწილეობა მივიღო. სასამართლოს ძალითაც რომ მომიწიოს ამის დამტკიცება უკან არ დავიხევ. ბათილად გამოვაცხადებინებ კონკურსს, თუ ისინი იმ საბუთებს, რომელიც მე გამაჩნია საკმარისად არ ჩათვლიან. ეს იქნება ჩემთვის ზუსტად იმის დამადასტურებელი, რომ ვიღაცა ძალიან ცდილობს გაცილებით იოლი გზებით მოხდეს ტელევიზიის სათავეში - ეს გამორიცხულია! ამასთან, რატომღაც მოთხოვნილ საბუთებში არ არის ცნობა ნარკოლოგიურიდან, რაც როგორც წესი სულ იყო. ეს უკვე მე ეჭვის საფუძველს მაძლევს ვიფიქრო, რომ ეს ადგილი ვიღაცისთვის მზადდება. მინდა ყველამ იცოდეს, რომ მე ბოლომდე ვიბრძოლებ, ეს არის ჩემი აბსოლუტურად შეუცვლელი გადაწყვეტილება"- აღნიშნა ნინო ზაუტაშვილმა.

კითხვაზე ხორციელდება თუ არა ხელისუფლების მხრიდან რაიმე სახის ჩარევა კონკურსთან დაკავშირებით და იკვეთება თუ არა მისი ინტერესი კანდიდატებთან დაკავშირებით, ნინო ზაუტაშვილმა თქვა:

"მე არ მინდა ისეთი განცხადებები გავაკეთო, რომელსაც საფუძველი არ აქვს. ამ წუთას მე ამის საფუძველი ნამდვილად არ მაქვს. თუ მე ამის საფუძველი გამიჩნდება, ამასაც ღიად და ხმამაღლა ვიტყვი. ამ წუთას მე საფუძველი არ მაქვს კონკრეტულად დავადანაშაულო ან სახელმწიფო, ან მთავრობა, ან კონკრეტული ადამიანები. მე ვგრძნობ ამ რაღაცა დინებებს და მესმის ის გაუთავებელი, სრულიად უსაფუძვლო საუბრები, ამიტომ მინდა ყველა წინასწარ გავაფრთხილო, რომ ძალიან ბევრ ენერგიას ამაში ნუ დახარჯავენ, რადგან ბრძოლის ბოლო ეტაპზე ეს ენერგია უფრო გამოადგებათ. იმიტომ რომ იქ უნდა იყოს კონკრეტული კონცეფცია წარმოდგენილი, ხედვა და ძალიან მნიშვნელოვანი სხვა რამ - ანუ კონკრეტულად როგორ აპირებენ კორპორატიული ერთიანობის მოპოვებას ამ არაჩვეულებრივ ტელევიზიაში. ამაზე პასუხი მაინტერესებს ყველა იმ კანდიდატისგან, ვინც ჩემთან ერთად იქნება წარდგენილი ვაკანტურ პოსტზე"- უთხრა "ნიუპოსტს" ზაუტაშვილმა.

შეგახსენებთ, რომ გიორგი ბარათაშვილმა საზოგადოებრივი მაუწყებლის გენერალური დირექტორის თანამდებობა 21 ნოემბერს დატოვა.

ბარათაშვილის თქმით, მას წასვლა წლის დასაწყისში ჰქონდა დაგეგმილი, მიზეზად ბარათაშვილმა საკუთარ გეგმები დაასახელა და აღნიშნა, რომ ტელევიზიას ახალი სისხლი და ახალი ძალა სჭირდება.

ნინო ზაუტაშვილის გარდა მედიაში იმ ადაიანების ვინაობებიც სახელდება, რომლებმაც შესაძლოა საზოგადოებრივი მაუწყებლის გენერალური დირექტორის ასარჩევ კონკურსში მიიღონ მონაწილეობა. მათ შორის არიან კოკა ყანდიაშვილი, ვასილ მაღლაფერიძე, გოგა ხაინდრავა, კობა ბექაური და ჟურნალისტი გიორგი ფოფხაძე.

დავით ჯაბაშვილი - "Newposts"