„საჩუქარი ამ რთულ და ნაცრისფერ დღევანდელობაში“- ნიკოლოზ რაჭველი

კულტურა - 14:28, 01 Dec, 2016

1896

„და აი, დადგა დეკემბერი, რომელიც უცებ ჩაივლის და მალე გვეწვევა ახალი წელი, რომელსაც უკვე მესამედ შევეგებებით ჩვენი ძვირფასი და წარმოუდგენლად ატაცებული პროექტით "მსოფლიო კინომუსიკის შედევრები" - წერს ნიკოლოზ რაჭველი სოციალურ ქსელში.
ნიკოლოზ რაჭველი: „არ მგონია ჩვენში ვინმე დარჩენილიყოს, ვისაც სურდა და არ დასწრებია, თუმცა მაინც გადავწყვიტეთ 29/30 დეკემბერს განუმეორებელ ანიტასთან ერთად (რომელსაც საბედნიეროდ აღმოაჩნდა რამდენიმე თავისუფალი დღე სამშობლოში ჩამოსასვლელად) კვლავ ვუმასპინძლოთ ჩვენს ძვირფას საზოგადოებას თბილისის დიდ საკონცერტო დარბაზში.
ეს პროექტი დიდი სიყვარულით შეიქმნა და ამიტომაც აღმოაჩნდა ხანგრძლივი სიცოცხლის უნარი, უკვე 11-ჯერ ჩატარდა და 25.000 მსმენელს გაუნაწილა სიხარული და კეთილი მოგონებები, რომელსაც თითოეული მუსიკალური ნაწარმოების აჟღერება იწვევს.
ჩარლი ჩაპლინი, ნინო როტა, ენიო მორიკონე, მიშელ ლეგრანი, ლალო შიფრინი, ასტორ პიაცოლა, ჯონ უილიამსი, გია ყანჩელი - განა ვინმეს ოდესმე შეიძლება მოსწყინდეს მათი კინოშედევრების მოსმენა?

ხოდა წინასაახალწლო განწყობისათვის გეპატიჟებით ჩვენს საღამოებზე, კიდევ ერთხელ გირჩევთ მოკიდოთ ხელი თქვენს მშობლებს, ბებიებს და ბაბუებს და გაახაროთ. ეს ის შემთხვევაა, როდესაც ზუსტად ვიცი თუ რამხელა სიხარულს აჩუქებთ მათ ამ რთულ და ნაცრისფერ დღევანდელობაში“...