”აუდიტორია 115“-ის წევრები თსუ-ს პირველ კორპუსში შეჭრას შეეცდებიან"- თსუ-ს არჩევნებში დელეგატობის კანდიდატი

საზოგადოება - 10:40, 25 Nov, 2016

1567

თბილისის სახელმწიფო უნივერსიტეტის თვითმმართველობის არჩევნებში დელეგატობის კანდიდატის ინფორმაციით, აუდიტორია 115 დღეს არჩევნების მიმდინარეობის პროცესში პროვოკაციებს გეგმავს. ისინი უსაფრთხოების სამსახურს უსაფრთხოების უზრუნველყოფისკენ მოუწოდებენ.

თსუ-ს თვითმმართველობის არჩევნებში დელეგატობის კანდიდატის ალისა სულამანიძის განცხადებით, ”აუდიტორია 115-ის” წარმომადგენლები 13:00 საათისთვის თსუ-ს პირველ კორპუსში შევარდნას და არჩევნების ჩაშლას შეეცდებიან.
”ამ არჩევნების მშვიდობიან გარემოში ჩატარებას ეწინააღმდეგება ”აუდიტორია 115”. ისინი ძალადობრივი და დესტრუქციული მეთოდებით ახორციელებენ მე-6 კორპუსის პიკეტირებას. 13:00 საათზე დაანონსებულია მათი შემოჭრა პირველ კორპუსში. კანდიდატებისთვის ყველაზე მნიშვნელოვანია მიმდებარე ტერიტორიაზე მყოფი ყველა ადამიანის უსაფრთხოება, ამიტომ პირველ რიგში საარჩევნო კომისიას მოვუწოდებთ უზრუნველყოს ამომრჩევლების უსაფრთხოება და ასევე უზრუნველყოს არჩევნების ისეთ გარემოში ჩატარება, სადაც არ ექნება ადგილი ექსცესებს. ასევე მოვუწოდებთ სამართალდამცველებს, რომ აღკვეთოს მათ მიერ გამოყენებული ძალადობრივი მეთოდები”, - განაცხადა სულამანიძემ.

დღეს თსუ-ში 140 დელეგატი აირჩევა. კენჭისყრა 18:00 საათზე დასრუდება.