ჯანმრთელობისთვის საშიში ნივთიერება სათამაშოებში

ჯანმრთელობისთვის საშიში ნივთიერება სათამაშოებში - რა იყიდება თბილისის მაღაზიებში

საზოგადოება - 16:15, 21 Nov, 2016

4540

საქართველოს კანონმდებლობის თანახმად, სარეალიზაციოდ განთავსებული საქონელი მომხმარებლისთვის უსაფრთხო უნდა იყოს. იმის შესამოწმებლად, თუ რამდენად სრულდება კანონის ეს მოთხოვნა, 2016 წლის 31 ოქტომბერს momxmarebeli.ge-მ თბილისის რამდენიმე მაღაზიაში 10-ი სხვადასხვა ტიპის თოჯინა შეიძინა და გერმანიაში, სათამაშოების უსაფრთხოების შემმოწმებელ აკრედიტებულ ლაბორატორიაში გააგზავნა, რომელსაც უსაფრთხოების რამოდენიმე ქიმიური მახასიათებლის შემოწმება დაევალა.

"ლაბორატორიიდან მიღებული პასუხის მიხედვით, ათი შემოწმებული სათამაშოდან ცხრაში აღმოჩნდა დიდი ოდენობით მავნე ნივთიერება დი-2-ეთილჰექსილფტალატი (DEHP), რომელიც ბავშვთა ჯანმრთელობისთვის საზიანოა.

მომხმარებლებს განვუმარტავთ, რომ DEPH ნივთიერება პლატსმასის დამარბილებელია. იგი საკმაოდ ხშირად გამოიყენება ტექნიკური დანიშნულების რბილ პლასტმასებში, რეზინებში, საიზოლაციო მასალებში. სათამაშოებში მისი გამოყენება ევროკავშირში აკრძალულია (დაშვებული შემცველობაა არა უმეტეს 1მგ/გ). საქართველოში ეს შეზღუდვა დაწესებული არ არის.

მომხმარებლებს ვურჩევთ მაქსიმალურად მოარიდონ ბავშვები იმ სათამაშოებს, რომელშიც მავნე ნივთიერება აღმოჩნდა.

ინფორმაცია სათამაშოებში აღმოჩენილი მავნე ნივთიერების შესახებ მიეწოდა როგორც შესაბამის მაღაზიებს, ასევე ეკონომიკისა და მდგრადი განვითარების სამინისტროს და საბაჟო დეპარტამენტს. ჩვენ აგრეთვე მივმართეთ საქართველოს მთავრობას, პარლამენტს და სახალხო დამცველს თხოვნით, მიიღონ ზომები მავნე ნივთიერებების შემცველი სათამაშოების საქართველოს ბაზარზე მოხვედრის აღსაკვეთად.

ჩვენ კვლავ გავაგრძელებთ ბაზარზე არსებული სათამაშოების უსაფრთხოების შემოწმებას და შედეგებს აქ გამოვაქვეყნებთ.“- ნათვამია momxmarebeli.ge-ს მიმართვაში.