"გადაუქროლებს ჩემს ქანდაკებას მერცხალთა გუნდი..."- "მეფე"დაბრუნდა (ფოტოკოლაჟი)

კულტურა - 18:20, 19 Nov, 2016

12788

„დედაენის ბაღში“ ქართველი მუსიკოსის, პოეტისა და მწერლის ირაკლი ჩარკვიანის „მეფე“-ს ძეგლი გაიხსნა. სკულპტურული კომპოზიცია ითვალისწინებს ხმოვან სისტემას, რომელიც კომპოზიციის შემადგენელ ნაწილში -სკამებშია დამონტაჟებული და, მათი საშუალებით, „მეფის“ მუსიკის მოსმენა 24 საათის განმავლობაშია შესაძლებელი.

სკულპტურული კომპოზიციის ავტორი მოქანდაკე ვლადიმერ იმერლიშვილია. პროექტი მერიის დაფინანსებით განხორციელდა.

„მეფე“-ს ძეგლის გახსნას მისი ოჯახის წევრები ესწრებიან. როგორც მუსიკოსის მამამ გელა ჩარკვიანმა განაცხადა იშვიათია, რომ მამა ესწრებოდეს ხელოვანი შვილის ძეგლის გახსნას. მისი თქმით ეს ძეგლი არა მარტო ირაკლი ჩარკვიანს ეკუთვნის, არამედ მასში პერსონიფიცირებულია მთელი მისი თაობა, რომელიც „მშიერმა მეოცე საუკუნემ გადასანსლა.“ :

„ყოველთვის მახსენდება ის „თოვლიან ქართა დევნით დაღლილი, გადაუქროლებს ჩემს ქანდაკებას მერცხალთა გუნდი, მე ისევ მოვალ, მხოლოდ არავის არ გაუმხილო, რომ მე დავბრუნდი.“ ირაკლის სწამდა რომ მას დაუფასებდნენ და მიხარია რომ ის ასე დააფასეს. მართალია ის ამბობს რომ ნურავის ნუ გაუმხელთ, რომ მე დავბრუნდიო. დღეს ირაკლი დაბრუნდა და ჩვენ ყველას გავუმხილეთ. ერთიც მინდა გითხრათ, იშვიათია, რომ მამა ესწრებოდეს ხელოვანი შვილის ძეგლის გახსნას, უნდა წარმოიდგინოთ როგორი გრძნობებია ჩემს გულში. ისეთი ძლიერი მუხტია, რომ მეჩვენება, რომ ის აუცილებლად გაარღვევს ჩვენი სამყაროს კიდეებს და გავა იმ რეალობაში სადაც მეგულება ირაკლი. ამ ძეგლში, ირაკლის პიროვნებაში არის პერსონიფიცირებული მთელი მისი თაობა, ის ბიჭები, რომლებიც დაუნდობელმა, აგონიაში მყოფმა სისტემამ გაანადგურა, როგორც ირაკლი ამბობდა „მშიერმა მეოცე საუკუნემ გადასანსლა.“ ეს ძეგლი ირაკლისიცაა და იმ დაკარგული თაობისაც. მადლობა მინდა ვუთხრა უპირველეს ყოვლის იმ ახალგაზრდა ხელოვანებს, რომლებმაც ეს ორიგინალური და არაორდინალური ძეგლი შექმნეს, მადლობა ქალაქის ხელმძღვანელობსა და მადლობა ქართულ საზოგადოებას, რომელიც არ ივიწყებს ირაკლი ჩარკვიანს“- განაცხადა გელა ჩარკვიანმა.