3000-ზე მეტი დაშავებული და 61 გარდაცვლილი ბავშვი - ავტოსაგზაო შემთხვევების საგანგაშო სტატისტიკა

საზოგადოება - 16:16, 19 Nov, 2016

34217

ავტოსაგზაო შემთხვევებში ბავშთა დაშავება-გარდაცვალების სტატისტიკური მონაცემები საგანგაშოა. როგორც ტრანსპორტისა და გზების ასოციაციის თავმჯდომარე დავით მესხიშვილმა დღეს ,,პრაიმტაიმის" პრესკლუბში ჟურნალისტებთან განაცხადა, ბოლო სამი წლის განმავლობაში დაშავდა 3000-ზე მეტი და გარდაიცვალა 61 ბავშვი, რაც საშუალო ევროპულ მაჩვენებელს ოთხჯერ აღემატება.

ტრანსპორტისა და გზების ასოციაცია პრობლემის კვლევას აპირებს. თბილისის მერიის დაკვეთით, ორგანიზაცია რეკომენდაციებს შეიმუშავებს, მათ შორის კანონმდებლობის გადახედვის და ასევე საგანმანათლებლო დონის გაზრდის მიმართულებითაც.

“საქართველოში ავტოსაგზაო შემთხვევებში გარდაცვლილთა რაოდენობა ყოველწლიურად 600 ადამიანს შეადგენს. რაც ყველაზე უფრო საგანგაშოა, ეს გახლავთ ბავშვები და განსაკუთრებით გაიზარდა ჩვილ ბავშვთა გარდაცვალებისა და ტრავმატიზმის მონაცემები. ბოლო სამი წლის განმავლობაში დაშავდა 3000-ზე მეტი და გარდაიცვალა 61 ბავშვი. ეს საშუალო ევროპულ მაჩვენებელს ოთხჯერ აღემატება, რაც ნიშნავს იმას, რომ ბავშვთა საგზაო უსაფრთხოების მიმართულება საქართველოში პრაქტიკულად არ არსებობს”, – განაცხადა დავით მესხიშვილმა.

მისივე თქმით, პროექტის “ბავშვთა საგზაო უსაფრთხოება” ასეთი შემთხვევბის რეალურ მიზეზებს შეისწავლის, რეკომენდაციები ბავშვების ტრანსპორტით უსაფრთხო გადაყვანას, ქუჩაში უსაფრთხო გარემოს შექმნას, ასევე საგზაო მოძრაობის ნორმების დაცვაზე ცნობიერების ამაღლებას შეეხება.