ექსპერტი საპატრიარქოს განცხადებას ეხმაურება - იმედი მაქვს კარგი შედეგის, მაგრამ დაზუსტებით თქმა არაკომპეტენტურია

საზოგადოება - 10:05, 13 Nov, 2016

5276

ვარძიის ღვთისმშობლის მიძინების ტაძარში გაჩენილ ხანძართან დაკავშირებით საქართველოს საპატრიარქოს მიერ გავრცელებულ განცხადებას ის ექსპერტები ეხმაურებიან, რომლებიც ადგილზე მუშაობენ.

„მე ვიმედოვნებ, რომ ძირითადი ნაწილი გაიწმინდება. თავიდანვე ვთქვი და ახლაც ვიმეორებ, რომ დიდი იმედი მაქვს ძალიან კარგი შედეგის, მაგრამ საბოლოო შედეგამდე რაიმე დაზუსტებით თქმა არაკომპეტენტურია. ერთი სანტიმეტრი ხომ შეიძლება, მაინც დარჩეს და ვარძიის ერთი სანტიმეტრიც უკვე ძალიან სერიოზულია. არის სირთულეები, რადგან ფერი რაც არის, ზოგად ფქვილად არის ქცეული და იმის ზემოდან ჭვარტლი რაც არის, შეიძლება, იმ ადგილას ისევ დარჩეს იმიტომ, რომ ფერი არ წამოჰყვეს იმ ჭვარტლს,“ - აცხადებს სახელმწიფო სამხატვრო აკადემიის რესტავრაციის მიმართულების ხელმძღვანელი, ნანა კუპრაშვილი.

რაც შეეხება საპატრიარქოს მოთხოვნას საკონსერვაციო სამუშაოების შეჩერებასთან დაკავშირებით, ნანა კუპრაშვილი ამბობს, რომ სრული საკონსერვაციო სამუშაოები ამ ეტაპზე არც იგეგმება და ზამთრის პერიოდის გასვლის შემდეგ გახორციელდება. თუმცა, მისივე თქმით, პირველადი სამუშაოების ჩატარება დროულად უნდა მოხდეს, რათა დაზიანებამ ფერწერულ ფენაში არ შეაღწიოს და მასზე მუშაობა დაგვიანებული არ აღმოჩნდეს.

საქართველოს საპატრიარქო 2 ნოემბერს ვარძიის ღვთისმშობლის მიძინების ტაძარში გაჩენილი ხანძრის შესახებ მედიით გავრცელებულ ინფორმაციას ეხმაურება, რომლის თანახმადაც, XII საუკუნის თამარის ფრესკისა და სხვა მოხატულობის აღდგენა შეუძლებელია.