სახალხო დამცველის აპარატი ყვარლის რაიონში გოგონების სავარაუდო წინდაცვეთის შემთხვევებს სწავლობს - ამის შესახებ "ნიუპოსტს" სახალხო დამცველის მოადგილემ განუცხადა.

ეკა სხილაძის ინფორმაციით, ომბუდსმენის წარმომადგენლები რაიონში იმყოფებოდნენ და ადგილობრივებს გაესაუბრნენ.

"სახალხო დამცველის აპარატმა თავისი ინიციატივით დაიწყო შესწავლა სავარაუდოდ, ქალის გენიტალიების დასახიჩრების ფაქტებთან დაკავშირებით. ჩვენი წარმომადგენლის მიერ განხორციელდა ვიზიტი აღნიშნულ რეგიონში, შეხვედრა გაიმართა ადგილობრივ მოსახლეობასთან, თუმცა საქმე შესწავლის პროცესშია და კონკრეტული ასე ვთქვათ ფაქტობრივი გარემოება არ გვაქვს რაზეც შეგვიძლია, ვისაუბროთ უახლოეს პერიოდში. სახალხო დამცველის აპარატი დაასრულებს საქმის შესწავლას და მოსახლეობისთვის ცნობილი გახდება ჩვენი შესწავლის შედეგების შესახებ"- განუცხადა "ნიუპოსტს" სხილაძემ.