გია ჯაჯანიძე: როდესაც გავიგეთ ასეთი დაჯგუფება არსებობდა და ისინი თბილისის ერთ-ერთ ცენტრში იკრიბებოდნენ, ჩვენ რა თქმა უნდა აღვშფოთდით, გავაგზავნეთ ჟურნალისტი და ჩავწერეთ ეს ახალგაზრდები. ჩვენი ვალი იყო ის რომ ეს ახალგაზრდები გვეჩვენებინა საზოგადოებისთვის და სხვადასხვა ორგანოებისთვის, რომ არსებობს ასეთი დაჯგუფება და ეს ბავშვები ცხოვრობენ ასე...

-როგორ დაჯგუფებაზე იყო საუბარი?

-მე ამ დაჯგუფებას კვალიფიკაციას ვერ მივცემ, იმიტომ რომ ესენი ხან ემოებს ეძახიან თავს, სექტასაც, სატანისტებსაც... მაგრამ იმ დროს, როდესაც მე ესენი მოვიყვანე, საზოგადოებას ვაჩვენე, რომ არსებობს ასეთი რაღაც... მაგრამ, სამწუხაროდ საზოგადოება ამას რატომღაც აღიქვამდა ამ ადამიანების პიარად.

ყველა გადაცემაში ვამბობდი, - გვიშველეთ, ნახეთ რა ხდება, ეს არ არის პროპაგანდა და ამას ვაკეთებდი, რომ ენახა ხალხს, შენ რომ საქართველოს მოქალაქე ხარ, უნდა იცოდე, შენს გვერდით ვინ ცხოვრობს, ამ დახურულ სივრცეს ამიტომ ვაჩვენებდით, რის გამოც ძალიან ბევრ ტალახს ვიღებდით.

ბოლოს რომ მოვიყვანე ეს ადამიანები, ფაქტობრივად რასაც ლაპარაკობდნენ, ჩვენებას აძლევდნენ, არანაირი რეაგირება არ მოჰყოლია, ჩვეულებრივად მიიღო ეს საზოგადოებამ და იმ ორგანოებმაც, ვისაც ამისთვის უნდა მიეხედა. იმ დროს მხოლოდ ერთი რამ გამოიკვეთა - ჯაჯანიძე პროპაგანდას უკეთებს ამ ხალხს. ამით შემოიფარგლნენ, იმით კი არა, რაც ხდებოდა. მოსულიყვნენ, გამოეცხადებინათ პროტესტი და გაერკვიათ რა ხდებოდა. არა! ჩემზე იყო დარტყმა.

-და საბოლოოდ აღმოჩნდა რომ სწორედ ამ ჯგუფის ერთ-ერთი წევრი კანიბალიზმშიც არის ეჭვმიტანილი...

-მე ვერაფერს ვიტყვი

-პროკურატურამ გაავრცელა ეს ინფორმაცია

- მე არ ვიცი რა მტკიცებულებები აქვთ იმათ, მაგრამ ჩემთვის და ძალიან ბევრი ადამიანისათვის ძალიან უცნაურები იყვნენ ესენი. და მეტი რა გამეკთებინა?

-გადაცემაში ბესო ჩუბინიძის მიმართ იყო დიდი გაღიზიანება

-ვინც ყველაზე მეტად აღშფოთდა ამ ბავშვებით, იმის მიმართ იყო გაღიზიანება, სოციალურ ქსელში ჩუბინიძე ლამის ფაშისტად გამოაცხადეს.

აქედან გამომდინარე დასკვნა - საზოგადოება რასაც უყურებს ტელევიზორში, პროპაგანდად კი არ გამოაცხადოს, უნდა მიხედოს. ჩემს გადაცემაში მე ვსვამ პრობლემას, რომ მე ეს ვნახე, აღმოვაჩინე, და ეხლა მიხედეთ თქვენ.