თბილისში, ბახტრიონზე, წუხელ ორი 19 და 24 წლის მამაკაცი, სავარაუდოდ ძმები ცეცხლსასროლი იარაღით დაჭრეს.

როგორც ირკვევა, დანაშაული 162-ე სკოლის სკოლის ტერიტორიაზე, მოედანზე მოხდა.

ადგილობრივებმა 7 გასროლის ხმა გაიგეს და სასწრაფოსაც სწორედ მათ გამოიძახეს. დაჭრილები რესპუბლიკურ საავადმყოფოში იმყოფებიან. ექიმის განცხადებით, მათ მრავლობითი ცეცხლნასროლი ჭრილობები აღენიშნებათ. შედარებით მძიმეა ერთ-ერთის 19 წლის ახალგაზრდას მდგომარეობა. მას ჭრილობა გულმკერდის არეში და ქვედა კიდურზე აქვს მიყენებული. დაჭრილს გვიან ღამით ოპერაცია ჩაუტარდა.

„ერთ მათგანს აღენიშნებოდა ორივე ბარძაყის გამჭოლი ცეცხლნასროლი ჭრილობა ამასთან მარცხენა გულ-მკერდის შემავალი ცეცხლნასროლი ჭრილობა. მეორე პაციენტს აღენიშნებოდა მარცხენა ბარძაყზე ცეცხლნასროლი ჭრილობა" - განაცხადა ქირურგმა სოსო გელაშვილმა.

კომენტარი გააკეთა შემთხვევის თვითმხილველმაც:

„სროლის ხმა გავიგე, ადგილზე რომ მივედი ერთი ფეხში იყო დაჭრილი ერთი ბავშვი იძახდა ვერ ვსუნთქავო, ზურგში იყო დაჭრილი, მუცელზე ეკიდა ხელი. "- აცხადებს თვითმხილველი.

ადგილზე გვიან ღამით გამოიძახეს 162-ე სკოლის სკოლის დირექტორი. სოფიო ფანცულაია ყვება, რომ ტერიტპორია პოლიციას შესაბამისი ლენტით ჰქონდა შემოსაზღვრული.

„ორი ახალგაზრდას დაჭრა მოხდაო, ურთიერთშელაპარაკება ვიღაცასთან მოხდა. ის ორი ახალგაზრდა (დაჭრილები) სავარაუდოდ ძმები არიან, ზუსტად ვერ გეტყვით“- აღნიშნა დირექტორმა.

როგორც "ნიუპოსტს" შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 117-ე და 236-ე მუხლებით დაიწყო, რაც ჯანმრთელობის განზრახ მძიმე დაზიანებას და ცეცხლსასროლი იარაღის უკანონოდ შენახვა-შეძენა-ტარებას გულისხმობს.

შსს დამატებით განმარტებას არ აკეთებს.