სარფის გამშვებ პუნქტთან ამ დრომდე რიგებია, საქართველოს ათეულობით მოქალაქე სამშობლოში გადმოსვლას ვერ ახერხებს

საზოგადოება - 10:08, 28 Oct, 2016

10938

სარფის სასაზღვრო პუნქტზე გადაადგილება ისევ შეფერხებულია. გამშვებ პუნქტთან საქართველოს მოქალაქეები თითქმის 24 საათია საზღვრის გადაკვეთას ვერ ახერხებენ. გვიან ღამით მხოლოდ ქალებმა და ბაშვებმა გადმოკვეთეს საზღვარი, ადგილზე მყოფი სხვა მოქალაქეები ვერც თურქეთის მხარეს გადადიან და ვერც საქართველოს ტერიტორიაზე ახერხებენ შემოსვლას.რაც შეეხება თურქეთის მოქალაქეებს, მათ შეუძლიათ სასაზღვრო კონტროლის გავლა როგორც საქართველოს, ასევე თურქეთის მხარეს.

თურქრული მხარე შეზღუდვის მიზეზად ტექნიკურ პრობლემას ასახელებს, თუმცა უცნობია როდის აღმოიფხვრება პრობლემა.

სარფში შექმნილ ვითარებასთან დაკავშირებით განმარტება საქართველოში თურქეთის კონსულმა გააკეთა.

მისი განცხადებით, ელექტრონული სისტემა მწყობრიდან გამოვიდა მთელი თრქეთის მასშტაბით და სარფის ანალოგიური სიტუაცია შექმნილია ქვეყნის ყველა გამშვებ პუნქტზე.

გენერალური კონსულის თქმით, სისტემა პერიოდულად ირთვება და ისევ ითიშება. ადგილზე სპეციალისტები მუშაობენ.

"ტექნიკური ხარვეზი შეიქმნა. არამარტო სარფშია არამედ მთელი თურქეთის მასშტაბით საჰაერო და და სახმელეთო პუნქტზეა შექმნილი. შესაბამისი უწყებები პრობლემის მოგვარებაზე მუშაობენ. სისტემა პერიოდულად ირთვება და ითიშება, თუმცა ჩვენ ვმუშაობთ და ვცდილობთ დროულად მოვაგვაროთ ეს პრობლემა"- აღნიშნა კოსნულმა.

ამის პარალელურად, საქართველოს მოქალაქეები აცხადებენ, რომ დღის ბოლოს გამშვებ პუნქტთან ვითარება დაიძაბა, საქართველოს რამდენიმე მოქალაქე ჟანდარმერიამ დროებით დააკავა კიდეც.

საქართველოს შემოსავლების სამსახურის ინფორმაციით, გვიან ღამით საზღვრის გადმოკვეთა რიგში მდგომმა საქართველოს 300-მდე მოქალაქემ შეძლო. თურქმა მებაჟეებმა და ჟანდარმერიამ მოქალაქეების იდენტიფიცირება ქართული მხარის დახმარებით შეძლეს. კერძოდ, მათ რიგში მდგომ საქართველოს მოქალაქეებს პასპორტები გამოართვეს და საქართველოს მხარესთან გადაამოწმეს.
სარფის სასაზღვრო პუნქტზე, თურქეთის მხარეს პროგრამული პრობლემა 26 ოქტომბერს, საღამოდან შეიქმნა.