სახალხო დამცველმა „კრწანისის“ ცენტრში მომხდარი შემთხვევის შესწავლა დაიწყო

საზოგადოება - 11:59, 25 Oct, 2016

1500

„კრწანისის“ ცენტრში მომხდარ ფაქტს საქართველოს სახალხო დამცველი შეისწავლის.
უჩა ნანუაშვილის აპირებს საქმესთან დაკავშირებით ყველა მასალა გამოითხოვოს და გაეცნოს.
ომბუდსმენის თქმით, მომხდართან დაკავშირებით ამ ეტაპზე კითხვები არ აქვს. სახალხო დამცველის თქმით, მისი წარმომადგენლები გუშაგს გაესაუბრნენ, რომელმაც გასროლა მოახდინა.
„ ჩვენი წარმომადგენლები გუშინ იმყოფებოდნენ ადგილზე, გაესაუბრნენ იმ სავარაუდო მოწმეებს, მათ შორის, იმ პირებს, ვინც უშუალოდ მონაწილეობდა ამ ინციდენტში. იგულისხმება გუშაგები, აქედან გამომდინარე, ჩვენ ვაგრძელებთ საქმის შესწავლას, ადამიანის უფლებების დარღვევის კუთხით ჩვენ ვერ ვხედავთ, რომ ჯერ რაიმე გამოიკვეთა, რადგანაც გამოძიება მიმდინარეობს და უნდა დაველოდოთ გამოძიებას. მე ჯერ არ მიჩნდება კითხვები იქედან გამომდინარე, რომ შესაძლოა, მართლაც იყო გარკვეული საკითხი პრობლემური, ანუ ის ადამიანები რომ იყვნენ გადასული სამხედრო ტერიტორიაზე, ამას ადასტურებენ გუშაგები. თუმცა, იყო თუ არა ყველა პროცედურა დაცული, ამას შევისწავლით. რაც შეეხება საქმეს, საქმესთან დაკავშირებით მასალები არ გაგვაჩნია. შესაბამისად, რამდენად სწორი კვალიფიკაციით მიმდინარეობს გამოძიება, ამაზე მოგვიანებით გვექნება რეაგირება“, - განაცხადა უჩა ნანუაშვილმა.
საქართველოს თავდაცვის უწყების ინფორმაციით წვრთნებისა და სამხედრო განათლების სარდლობის მხარდამჭერ ცენტრ კრწანისის ტერიტორიაზე უცხო პირების მხრიდან შეჭრის ფაქტი 23 ოქტომბერს, დაახლოებით 03:30საათზე დაფიქსირდა. რამდენიმე უცხო პირი არ დაემორჩილა განწესში მყოფი გუშაგის სიტყვიერ გაფრთხილებას და თავს დაესხა მას, რის შემდეგაც გუშაგმა წესდებით გათვალისწინებული მოქმედებები განახორციელა და ცენტრის ტერიტორიაზე შეჭრის ფაქტი აღკვეთა. განხორციელებული სროლის შედეგად 23 წლის გიგა შენგელაია დაიღუპა.

კრიტიკის საგანი თავდაცვის მინისტრის გუშინდელი განცხადება გახდა, ლევან იზორიას თქმით გ უშაგი სროლის დროს კანონის დაცვით მოქმედებდა. ექსპერტების და პოლიტიკოსების შეფასებით გამოძიების დასრულებამდე მსგავსი შინაარსის განცხადების გაკეთება სამხედრო პოლიციისთვის ერთგვარი მინიშნება შეიძლება გახდეს და კრწანისის პოლიგონთან მომხდარის შესწავლა სხვა მუხლით გააგრძელონ. ამჟამად კი საქმეს მთავარი პროკურატურის ზედამხედველობით, თავდაცვის სამინისტროს სამხედრო პოლიციის დეპარტამენტი იძიებს. გამოძიება სსკ-ის 116-ე მუხლის I ნაწილით მიმდინარეობს.