"მე დილით ავიყვან ჩემ ბავშვს, გავიყვან ქუჩაში" - მოკლული შენგელიას მამა გამოძიებას უნდობლობას უცხადებს

საზოგადოება - 10:18, 25 Oct, 2016

12645

კრწანისის სამხედრო ბაზაზე ლიკვიდირებული გიგა შენგელიას მამა საპროტესტო აქციებით იმუქრება. რომან შენგელიას თქმით, იმ შემთხვევაში თუ გამოძიება ეფექტურად და სამართლიანად არ წარიმართება, ცხედარს ზუგდიდის ცენტრში გადაასვენებს.

შენგელიები გამოძიების ოფიციალურ ვერსიას უნდობლობას უცხადებენ და საქმეში დამოუკიდებელი ექსპერტის ჩართვას გეგმავენ.

"ექსპერტიზა აუცილებლად უნდა ჩატარდეს ჩვენ მიერ აყვანილი დამოუკიდებელი ექსპერტის მიერ. ერთი შვილი აგერ მისვენია, მეორე შვილის დასვენებას მე არ ვაპირებ. ველოდები ხვალ დილამდე. გამოძიება უნდა ჩაატარონ ისე, როგორც საჭიროა. ისე არა, როგორც თვითონ უნდათ. თუ არა და, მე დილით ავიყვან ჩემ ბავშვს, გავიყვან ქუჩაში,“ - აცხადებს რომან შენგელია.

დაღუპული ახალგაზრდის მამის თქმით, საგამოძიებო ორგანოები ცდილობენ, დანაშაული მის მეორე შვილს დააბრალონ.

"გამომძიებელმა უთხრა ჩემს ძმას, რატო იმალება გიორგიო, რა ჭირს დასამალი ბავშვს?! გიგა 03:30 საათზე მოკლეს, გვამი კი 07:20 წუთზე ნახეს. 100 მეტრში ეგდო ბავშვი ... იქნებ შველა შეიძლებოდა"- აცხადებს შვილმკვდარი მამა.

რომან შენგელიას თქმით, კვალის დაფარვას ცდილობენ. შენგელია ეჭვობს, რომ მინისტრის საქმის კურსშია.

"ასეთი რაღაცეები არ იფარება, მინისტრმა რომ არ იცოდეს ისე"- თქვა 23 წლის ახალგაზრდას მამამ.

თავდაცვის სამინისტროს ინფორმაციით, ცენტრ ”კრწანისის” ტერიტორიაზე უცხო პირების შეჭრის მცდელობას ჰქონდა ადგილი. ისინი არ დაემორჩილნენ განწესში მყოფი გუშაგის სიტყვიერ გაფრთხილებას და თავს დაესხნენ მას, რის შემდეგაც გუშაგმა წესდებით გათვალისწინებული მოქმედებები განახორციელა და ცენტრის ტერიტორიაზე შეჭრის ფაქტი აღკვეთა. თავდაცვის სამინისტროს სამხედრო პოლიციის დეპარტამენტის თანამშრომლებმა, ცენტრის მიმდებარე ტერიტორიის დათვალიერებისას, ერთ-ერთი თავდამსხმელის ცხედარი აღმოაჩინეს. ის უკვე იდენტიფიცირებულია. გარდაცვლილი 1993 წელს დაბადებული, ზუგდიდელი გიორგი შენგელიაა.

საქმეს მთავარი პროკურატურის ზედამხედველობით, თავდაცვის სამინისტროს სამხედრო პოლიციის დეპარტამენტი იძიებს. გამოძიება სსკ-ის 116-ე მუხლის I ნაწილით მიმდინარეობს.