„რაფერ ვართ ბიძია იცი?-ხუთი კაცი, რომ წავა სათევზაოდ და ერთი დაიჭერს“-ოზურგეთელი ტაქსის მძღოლები

საზოგადოება - 12:52, 24 Oct, 2016

1399

გურული ტაქსისტების თქმით, საწვავზე ფასის მატება და ლარის გაუფასურება, მათ მიერ დაწესებულ ტარიფზე აუცილებლად აისახება და ადრე თუ ცენტრალურ უბნებში გადაადგილება 3-4 ლარის ფარგლებში მერყეობდა, ფასი უახლოეს მომავალში შეიძლება 5 ლარამდე გაიზარდოს. მომსახურების ფასების მატებაზე საუბრობენ ის ტაქსის მძღოლები, რომლებსაც ავტომობილი ბენზინზე ჰყავთ.
გურამი, 60 წლის, ოზურგეთი: „რაფერ ვართ ბიძია იცი? ხუთი კაცი, რომ წავა სათევზაოდ და ერთზე წამოეგება თევზი და ბიძას გაუხარდება. ისე ვართ ტაქსიტებიც. დაღამდა გუშინ და ერთი კლიეტი მოვიდა 5 ლარიანი.“
გია, 45 წლის, ოზურგეთი: „გამახარე, კლიენტი მეგონე. საერთოდ არ გვაქვს მუშაობა, ხალხს ფული არა აქვს ტაქსის. დადიან ავტობუსებით, ან ფეხით.“
შალვა, 55 წლის, ოზურგეთი: „ზაფხულში დამსვენებელი რომ ჩამოდის, არის მუშაობა ზამთართან შედარებით. ყოველშემთხვევაში, მაშინ პურის ფული გვაქვს“.
დათო, 37 წლის, ჩოხატაური: „როცა თხილი შემოდის, მაშინ დადიან ტაქსებით. მერე გაჩერებულია ხალხი. რომ იმგზავროს ტაქსით, რა გადაიხადოს? სამუშაო არსად არაა. მუშაობს მარტო სახელმწიფო სამსახურის ხალხი და იმათ ყველას ყავს მანქანა.“
თამაზი, 58 წლის, ჩოხატაური: „ბაზარი რომ არ მუშაობს, ვაჭრობა არ აქვთ, მაღაზიაში ხალხი ვერ შედის, ტაქსით ვინ იმგზავრებს? უჭირს ხალხს ძალიან და ტაქსის კი არა, სიგარეტის ფული არა აქვთ. მთელი დღის განმავლობაში, იმდენი მშიერი დადის.“
ვაჟა, 62 წლის, ჩოხატაური: „ბენზინზე ფასმა თუ მოიმატა, იძულებული ვიქნებით ჩვენც გავზარდოთ თანხა. ახლა იაფია და ვერ მგზავრობს ხალხი ტაქსით და რომ გავზრდით თანხას, საერთოდ ვერ იმგზავრებენ. გამოდის, რომ მგზავრი თუ არ იქნება, ჩვენ მშიერი დავრჩებით.“
გივი, 38 წლის, ოზურგეთი: „ვისაც არ ეზარება, ყველა „ტაქსაობს“. არაფერს ვამბობ იმ ადამიანებზე, რომლებმაც შემოსავალი დაკარგეს და არსებობის სხვა საშუალება არა აქვთ. ჩემს გვერდით, რამდენიმე ისეთი „ტაქსისტია“, რომელთაც აქვთ სამსახური, მაგრამ დღის განმავლობაში საშოვარზე მაინც გამოდიან. ასეთები არიან მაგალითად, მიკროავტობუსის მძღოლები, რომლებიც დღეგამოშვებით მუშაობენ და დასვენების დღეებში „ტაქსისტობას“ ითავსებენ. ეს ნიშნავს იმას, რომ არ ყოფნით ფული ოჯახები რომ არჩინონ.“
იაშა, 34 წლის, ოზურგეთი: „ხალხში ფული არაა, ვდგავართ სტაინკაზე, დაღამდება წავალ სახლში, ესაა ჩვენი სამსახური“.
გიორგი, 39 წლის, ოზურგეთი: „ფასმა თუ აიწია საწვავზე არც ღირს მუშაობა. დავჯდებით სახლში. პურის ფულსაც ვერ ვაკეთებთ.“