ყაჩაღობა მოხდა გუშინ გვიან ღამით, ოზურგეთის მუნიციპალიტეტის სოფელ ნატანებში, სამმა, ცივი იარაღით შეიარაღებულმა პირმა, 77 წლის ქალბატონი დააყაჩაღა.

როგორც დაზარალებული "გურიის მოამბესთან" ყვება, დაახლოებით ღამის 4 საათზე, მის სახლში სამი პირი შეიჭრა, რომლებიც დანებით იყვნენ შეარაღებულები და ფულს ითხოვდნენ.

"სამივე უნიღბოდ იყო. ხელში დანები ეჭირათ. მომთხოვეს ფული გვინდაო. ხელჩანთა მივეცი, რომელშიც 30 ლარი მედო. წაიღეს და წავიდნენ. სამივე ვიცანი, ჩემთან ხშირად უმუშავიათ ეზში, ხან მიბარავდნენ, ხან მანდარინის საკრეფად მოდიოდნენ და ამაში ფულს ვუხდიდი"-გვეუბნება ლიდა ხომერიკი.

ქალბატონის თქმით, მეზობლებს მალევე შეატყობინა მომხდარის შესახებ. გამოიძახეს საპატრულო პოლიცია, რომელმაც სამივე მათგანი მერია-თხინვალის გზაზე დააკავა. ისინი ფეხით გადაადგილდებოდნენ.

დაკავებულთაგან ორი სოფელ მერიის მკვიდრია, ერთი კი მეზობელ სოფელში, ხვარბეთში ცხოვრობს.

შსს პრესცენტრის ცნობით, მომხდარზე გამოძიება 179-ე მუხლით მიმდინარეობს.
ლიდა ხომერიკი, ნატანებშში ცოტა ხნის ჩამოვიდა. ის თბილისში, საკუთარ შვილთან ერთად ცხოვრობს და ადგილზე ზაფხულობით ჩამოდის.