რონალდინიო აზერბაიჯანულ კლუბში გადასვლას არ გამორიცხავს

სპორტი - 17:28, 20 Oct, 2016

6944

ფეხბურთის ლეგენდა რონალდინიო აზერბაიჯანს სტუმრობს. ბრაზილიელის ბაქოში ჩასვლის მიზეზი იქ მისი სახელობის საფეხბურთო აკადემიის გახსნაა, რომელიც მსოფლიოში რიგით მესამეა, აქამდე ეს აკადემიები არსებობდა ბრაზილიაში და დუბაიში. აკადემიაში წრთვნას ბავშვები 6 წლიდან გაივლიან, რონალდინიომ პირობა დადო რომ ნიჭიერ ბავშვებს ის თყავად დაეხმარება კარიერულ წინსვლაში.

ბაქოში გამართული პრესკონფერენციისას ბრაზილიელმა ფეხბურთელმა საკუთარ კარიერაზეც ისაუბრა და არ გამორიცხა, რომ თამაში აზერბაიჯანულ კლუბში გააგრძელოს.

„მე ჯერ არ მიმიღია გადაწყვეტილება ჩემი კარიერის შესახებ, გადაწყვეტილებას ალბათ დეკემბრის ბოლომდე მივიღებ. შესაძლოა მე გამოსამშვიდობებელი მატჩი ჩავატარო ან გავაგრძელო ისევ თამაში. ჩემი გადასვლა აზერბაიჯანულ კლუბში? რატომაც არა?“- განაცხადა რონალდინიომ.

მსოფლიო ფეხბურთის ვარსკვლავს შეკითხვა მისი ფავორიტი ფეხბურთელების შესახებაც დაუსვეს, რონალდინიოს თქმით ის მსოფლიოში საუკეთესოდ არგენტინელ ლიონელ მესის თვლის:

"მე ვთვლი, რომ მესი მსოფლიოს საუკეთესო ფეხბურთელია. პელე და მარადონა? ვფიქრობ რომ ისინი ჩემთვის ერთ დონეზე არიან“- აღნიშნა რონალდინიომ.