ცნობილი თურქი ვარსკვლავისა და ქართველი მსახიობების ტანდემი "დარისპანის გასაჭიში"

კულტურა - 15:12, 20 Oct, 2016

2262

თბილისის აზერბაიჯანული თეატრის სამხატვრო ხელმძღვანელის ვარლამ ნიკოლაძის მოწვევით თბილისს ცნობილი თურქი მსახიობი ნეჯათი ზენგინი ეწვევა. ნეჯათინ ზენგინი სპექტაკლში „დარისპანის გასაჭირი“ დარისპანის როლს ითამაშებს. ის, ქ. ტრაბზონის სამხატვრო თეატრის ხელმძღვანელი და თეატრისა და კინოს არტისტი გახლავთ.

თურქ კოლეგას, ახალგაზრდა აზერბაიჯანელ მსახიობებთან ერთად, პარტნიორობას ცნობილი ქართველი მსახიობი ლაურა რეხვიაშვილი გაუწევს. იგი, სპექტაკლში მართას როლს ითამაშებს. ნეჯათი ზენგინის თბილისში ჩამოსვლას თურქეთის რესპუბლიკის საელჩო და მასთან არსებული იუნუს ემრეს სახელობის სახელობის კულტურის ცენტრი უზრუნველყოფს.
ჰ. ალიევის სახელობის თბილისის აზერბაიჯანული სახელმწიფო პროფესიული დრამატული თეატრი ახალ სეზონს პრემიერით „დარისპანის გასაჭირი“ გახსნის, მაგრამ ავარიული შენობისა და განადგურებული ინფრასტრუქტურის გამო, მაყურებელს თეატრის ფაქტობრივ მისამართზე ვერ მიიღებს, რადგან თეატრს არ გააჩნია გამართული, ტექნიკურად აღჭურვილი სცენა და მაყურებელთა დარბაზი. ამიტომ, თბილისის აზერბაიჯანული დრამატული თეატრის ახალგაზრდული დასი, ლაურა რეხვიაშვილთან და ნეჯათი ზენგინთან ერთად თავის მაყურებელს კახა ბაკურაძის მოძრაობის თეატრში უმასპინძლებს.
პროექტი, საქართველოს კულტურისა და ძეგლთა დაცვის სამინისტროსა და ქ. თბილისის მერიის კულტურული ღონისძიებების ცენტრის მხარდაჭერით განხორციელდება. სპექტაკლებში, თბილისის აზერბაიჯანული დრამატული თეატრის ახალგაზრდა მსახიობები-ლეილა კასუმოვა, ასლან მამედოვი, თურგაი ველი-ზადე, ნამიკ მუსაევი, ბიულ ბიულ ალიევა და აისელ მამედოვა ითამაშებენ.

პრემიერა, 1, 2, 3- ნოემბერს, 19:00 საათზე, კახა ბაკურაძის მოძრაობის თეატრში (მუშტაიდის ბაღის ტერიტორია) გაიმართება.