ილიას უნივერსიტეტში ბორის აკუნინთან შეხვედრა გაიმართება

საზოგადოება - 12:38, 18 Oct, 2016

1901

18 ოქტომბერს, 19:00 საათზე, ქართული წიგნის ეროვნული ცენტრის მოწვევითა და ილიას სახელმწიფო უნივერსიტეტის ორგანიზებით, ილიას სახელმწიფო უნივერსიტეტში გაიმართება მწერალ ბორის აკუნინის (გრიგოლ ჩხარტიშვილი) შეხვედრა მკითხველთან.

დღეისათვის ყველაზე პოპულარული ქართული წარმოშობის რუსი მწერალი და, ამასთანავე, ლიტერატურათმცოდნე, იაპონისტი, მთარგმნელი და საზოგადო მოღვაწე გრიგოლ ჩხარტიშვილი, რომელიც ბორის აკუნინის ფსევდონიმითაა ცნობილი, 1956 წელს საქართველოში, ზესტაფონში, დაიბადა. მისი ოჯახი მალევე გადავიდა საცხოვრებლად მოსკოვში, სადაც მწერალი გაიზარდა. სწავლობდა რუსეთში, ისტორია-ფილოლოგიის ფაკულტეტზე, აქვს ისტორიკოს–იაპონიისმცოდნის დიპლომი. არის მხატვრული ლიტერატურის მთარგმნელი ინგლისური და იაპონური ენებიდან. გამოქვეყნებული აქვს როგორც ესეისტიკა („მწერალი და თვითმკვლელობა“ 1999), ისე ისტორიული ჟანრის ნაწარმოებები („რუსეთის სახელმწიფოს ისტორია“, 2013-იდან დღემდე) . პირველი მხატვრული ნაწარმოები ბორის აკუნინის სახელით 1998 წელს გამოაქვეყნა. განსაკუთრებული პოპულარობა მწერალს მოუტანა ისტორიულ-დეტექტიური რომანების სერიამ ერასტ ფანდორინზე. მისი რომანები თარგმნილია მრავალ ენაზე და მრავალჯერაა ეკრანიზებული.

მწერალთან შეხვედრა გაიმართება კითხვა-პასუხის რეჟიმში.

შეხვედრის მოდერატორია მაია ჯაგი, ლონდონში მოღვაწე ლიტერატურის კრიტიკოსი და კულტურის ჟურნალისტი, ქართული წიგნის ეროვნული ცენტრის პარტნიორი

მაია ჯაგი მრავალი ჯილდოს მფლობელი ლიტერატურის კრიტიკოსი და კულტურის ჟურნალისტია. მას განათლება მიღებული აქვს ოქსფორდის უნივერსიტეტსა და ლონდონის ეკონომიკის სკოლაში. მისი ავტორობით სტატიები ქვეყნდება Financial Times -სა და the Guardian-ში. ინტერვიუ აქვს ჩაწერილი ლიტერატურის სფეროს 12 ნობელიანტისგან და არის მრავალი ლიტერატურული კონკურსის (მაგ.: Dublin Impac Prize, Man Asian Literary Prize in Hong Kong) ჟიურის წევრი / თავმჯდომარე. შეხვედრის დასასრულს, გრიგოლ ჩხარტიშვილს მიენიჭება ილიას სახელმწიფო უნივერსიტეტის საპატიო დოქტორის წოდება.

შეხვედრის განრიგი

19:00-19:15 - მისასალმებელი სიტყვა

პროფესორი გიგა ზედანია, ილიას სახელმწიფო უნივერსიტეტის რექტორი სალომე მაღლაკელიძე, ქართული წიგნის ეროვნული ცენტრის საერთაშორისო პროექტების მენეჯერი მაია ჯაგი, ლიტერატურის კრიტიკოსი და კულტურის ჟურნალისტი

19:15-19:30 - მოხსენება გრიგოლ ჩხარტიშვილი (ბორის აკუნინი)

19:30-20:15 - კითხვა-პასუხი

20:15-20:30 - ილიას სახელმწიფო უნივერსიტეტის საპატიო დოქტორის წოდების მინიჭების ცერემონია

დრო: 18 ოქტომბერი, 19:00 საათი

ადგილმდებარეობა: B 202 აუდიტორია (ი.ჭავჭავაძის გამზ. #32), ილიას სახელმწიფო უნივერსიტეტი

სამუშაო ენა: ინგლისური (უზრუნველყოფილი იქნება სინქრონული თარგმანი)

ადგილების რაოდენობა: 250 დასწრება თავისუფალია.