ბობ დილანმა ლიტერატურის დარგში ნობელის პრემია მიიღო

კულტურა - 17:03, 13 Oct, 2016

2284

ლიტერატურის დარგში ნობელის პრემია ლეგენდარულმა მომღერალმა და მწერალმა ბობ დილანმა მოიპოვა. ნობელის კომიტეტის წევრების შეფასებით "დილანმა ამერიკული სიმღერის ტრადიციებთან ერთად, პოეზიის ახალი სახე შექმნა".

ამერიკელი მუსიკოსი, პოეტი, მხატვარი და კინომსახიობი ბობ დილანი 1941 წლის 24 მაისს მინესოტის შტატში დაიბადა. 60-იანი წლებიდან მან უდიდესი წვლილი შეიტანა ამერიკული მუსიკის განვითარებაში. ჟურნალ Rolling Stone-ის გამოკითხვით, იგი The Beatles-ის შემდეგ, მუსიკის ისტორიაში მნიშვნელობით მეორე ადგელზეა. გარდა ამისა, დილანი გრემის 9 ჯილდოს მფლობელია.

ნობელის პრემიის ლაურეატების დაჯილდოების ცერემონია სტოკჰოლმში, 10 დეკემბერს გაიმართება. პრემიის რაოდენობა 953 ათას აშშ დოლარს შეადგენს.

ლიტერატურის დარგში ნობელის პრემიაზე ძირითად პრეტენდენტებად სახელდებოდნენ იაპონელი მწერალი ჰარუკი მურაკამი, კენიელი მწერალი და დრამატურგი ნგუგი ვა ტჰიონგო, ამერიკელი ჯოის ქეროლ ოუთსი, ფილიპ როტი და სირიელი პოეტი ადონისი.

ნობელის კომიტეტის წესდებაში აღნიშნულია, რომ “ლიტერატურას წარმოადგენს არა მხოლოდ ბელეტრისტიკა, არამედ ასევე სხვა ნაწარმოებები, რომლებიც ფორმით ან სტილით ლიტერატურულ ღირებულებას წარმოადგენენ”.