„ვულოცავ ჩემს მარიამს, ევროვიზიაზე მიდის“

„ვულოცავ ჩემს მარიამს, ევროვიზიაზე მიდის“ - გიგა კუხიანიძე

კულტურა - 11:55, 03 Oct, 2016

9917

2016 წლის საბავშვო ევროვიზიის კონკურსზე საქართველოს, 10 წლის მარიამ მამადაშვილი წარადგენს. „ვულოცავ ჩემს მარიამს, ევროვიზიაზე მიდის“ - წერს „ფეისბუქის“ პირად გვერდზე გიგა კუხიანიძე და უამრავ მილოცვას იღებს. საკონკურსო სიმღერაზე მარიამ მამადაშვილთან ერთად კომპოზიტორმა გიგა კუხიანიძემ იმუშავა.
კონკურსანტი ხუთკაციანმა ჟიურიმ შეარჩია. არჩევანის გაკეთება ჟიურის წევრებს ორ კონკურსანტს - მარიამ მამადაშვილსა და 14 წლის, ლუკა კაჭარავას შორის მოუწიათ, საბოლოოდ არჩევანი მამადაშვილზე შეაჩერეს.
სიმღერის პრემიერას მაყურებელი უახლოეს პერიოდში, პირველი არხის ეთერში, იხილავს.

მარიამ მამადაშვილი 4 წლიდან მღერის. სწავლობდა სტუდიაში - „ბზიკებისტუდიო“, ასევე ევგენი მიქელაძის სახელობის თბილისის სახელმწიფო სამუსიკო სკოლაში, ფორტეპიანოს განხრით. მონაწილეობდა სხვადასხვა კონცერტებსა და სატელევიზიო შოუებში.

2014 წელს ათონელის თეატრში დადგმულ სპექტაკლში „ანა და მე“ შეასრულა პრინცესას როლი.

2015 წლიდან მარიამ მამადაშვილი ცხოვრობს აშშ-ში და სწავლობს Tomlinson Middle School-ის VI კლასში.

2015 წლის სექტემბრიდან ჩაირიცხა მუსიკალურ სასწავლებელში Broadway Method Academy, სადაც დღემდე ეუფლება ვოკალს, ცეკვას და სამსახიობო ოსტატობას.