თბილისის სახელმწიფო უნივერსიტეტის რექტორს დღეს აკადემიური საბჭო აირჩევს. აღნიშნულ თანამდებობაზე სამი კანდიდატურაა წარდგენილი. განათლების მინისტრის ყოფილი მოადგილე გია შარვაშიძე, უნივერსიტეტის პროფესორი ცირა ბარამიძე და პროფესორი გიორგი ბარამიძე.

სტუდენტები გია შარვაშიძის სასარგებლოდ აკადემიური საბჭოს წევრებზე ზეწოლაზე საუბრობენ. ისინი მიიჩნევენ, რომ განათლების მინისტრის ყოფილი მოადგილის კანდიდატურას ხელისუფლება ლობირებს. სტუდენტები ასევე მიიჩნევენ, რომ შარვაშიძის გამარჯვების შემთხვევაში, სახელმწიფო უნივერსიტეტი ავტონომიურობას დაკარგავს.

„აკადემიური საბჭოს რამდენიმე წევრს ურეკავდნენ და შარვაშიძისთვის მიეცათ ხმა, თუმცა ამაზე ხმამაღლა ვერ საუბრობდნენ. ჩვენ ვიცით ეს და ეს ბევრმა იცის უნივერისტეტში, ამიტომ გვგონია, რომ რაც არ უნდა გამჭვირვალე იყოს არჩევნების პროცესი, მისი წინაპირობა არ იყო გამჭვირვალე და არ იყო დემოკრატიული,“ - განაცხადა თსუ-ის სტუდენტური მოძრაობა აუდიტორია 115-ის წევრმა ნათია ქარჩილაძემ.