საბას დაჯილდოების სკანდალი გრძელდება - საპასუხო წერილი კრიტიკოს მუსიკოსებს

საზოგადოება - 12:48, 20 Sep, 2016

4926

ლიტერატურული პრემია „საბას“ დაჯილოდოების ცერემონიალს, რომელიც მუხრანბატონის სასახლის ეზოში გაიმართა, ცნობილ მუსიკოსთა სიბრაზე მოჰყვა. სოციალურ ქსელში გავრცელდა უამრავი პოსტი, შენიშვნა თუ კრიტიკული წერილი...მუსიკოსები ლიტერატორთა ქცევას აპროტესტებდნენ და მათ მუსიკის არ მოსმენასა და უკულტურობაში ადანაშაულებდნენ. „ნიუპოსტის“ გვერდზე განთავსებულ მუსიკოსთა კრიტიკას საპასუხო წერილი მოჰყვა.

დოდო ყვავილაშვილი: „ერთი ცხვრისკენ, ერთი მგლისკენო, ნათქვამია. ამიტომ, არ ვიცი მგელი ვინ არის, ალბათ ამ წერილის ავტორისათვის ლიტერატორები, მაგრა გავბედავ და მათ ორიოდ სიტყვას მაინც შევაწევ. ღონისძიების მოსაწვევებზე ეწერა, რომ ცერემონიალი 8 საათზე დაიწყებოდა, ხოლო თბილისიდან ავტობუსები გავიდნენ 7 საათზე, ასე, რომ ზუსტად 7 საათსა და 30 წუთზე ყველანი იქ ვიყავით. რბილად რომ ვთქვა, საკმაოდ გრილოდა, სახემოღუშული მასპინძლები მკაცრად აწესრიგებდნენ ვინ სად უნდა დამჯდარიყო. როდესაც ამაღლებულ განწყობას სიცივის გამო ოდნავი ბზარი შეეპარა და იმასაც მივხვდით, რომ 9 საათამდე ცერემონიალი არ დაიწყებოდა, გადავწყვიტეთ ჩვენი ძალებით მაინც გაგვეთბო გაყინული ძვლები.ეზოში რომ ვერაფერი მოვიძიეთ, (მიუხედავად იმისა, რომ ზოგიერთი ხელში სასმელით დადიოდა, ან მასპინძლები იქნებოდნენ, არ ე.წ. პატივსაცემი სტუმრები), რესტორანს მივადექით, მაგრამ იქაც ისეთი მკაცრსახიანი და რატომღაც კატეგორიული ადამიანები დაგვხვდნენ, რომ დღემდე ვერ მივმხვდარვარ რით იყო გამოწვეული მათი ესოდენ გაუმართლებელი სიმკაცრე. მკაცრსახიანებმა რესტორანში შესვლა და ჩვენი ხარჯით თითო ჭიქა ჩაისა თუ ყავის დალევა სასტიკად აგვიკრძალეს და მხოლოდ კარგა ხნის ხვეწნის შემდეგ დაგვრთეს ნება სულ ცოტა ხნით შევსულიყავით უკვე სასიცოცხლოდ აუცილებელ თბილ გარემოში, რათა სული თითო ჭიქა ჩაით მოგვებრუნებინა. ამასობაში დაჯილდოებაც დაიწყო და ,ცხადია, ისევ გარეთ გამოვედით. დაჯილდოების ცერემონიალის დასრულებისას საბოლოოდ გაფიჩხულ ლიტერატორებს ისღა დარჩენოდათ ერთმანეთის ნახვითა და მილოცვით გაეთბოთ დამზრალი სხეულები. და სულაც არ გამკვირვებია, როდესაც დაჩაგრული ქვეყნის დაჩაგრულმა ლიტერატურულმა ელიტამ ღვინისკენ გაიწია, მაგრამ ნურას უკაცრავად, როგორც ერთი პოლიტიკოსი იტყოდა, მათ გზა კვლავ მკაცრსახიანმა ჯეელებმა გადაუღობეს. ჰო, მართლა, სულ დამავიწყდა, ის მუსიკოსები, რომლებიც ლიტერატორთა საქციელმა ასე გაანაწყენა, მთელი ამ ხნის მანზილზე სწორედ იმ რესტირანში ისხდნენ თბილ გარემოში ყავით, ჩაით, ღვინითა და ხილით და მხოლოდ თავიანთი გამოსვლისთვის ადიოდნენ სცენა საკუთარი თავის პატივისმცემელ ყველა რესტორანს გააჩნია პლედები, რათა გაუთვალისწინებელი( ან თუნდაც გათვალისწინებული) სიცივის დროს მათ სტუმრებს არ შესცივდეთ, ასევე ყველა საკუთარი თავის პატივისმცემელ დაწესებულებაში დგას წყლისა თუ ყავის აპარატები... არა მგონია ღონისძიების მომწყობების ბიუჯეტზე ამ ხარჯებს სერიოზული ზიანი მიეყენებინათ...დამერწმუნეთ, ეს გულგრილობა და მასზე დამატებული მკაცრი შეხვედრა ლიტერატორთა სათუთ ბუნებაზე მძიმე შთაბეჭდილებას დატოვებდა. ლიტერატორი, მწერალი იქნება იგი თუ მთარგმნელი, სათუთი ბუნების ადამიანია და ყველაფერს მეტი სიმძაფრით აღიქვამს.ასე, რომ მკაცრადაც ნუ განსჯით, როდესაც მათ ჩარჩოებში ჩასმას ცდილობენ. საწყენია, რომ ისეთ კარგ წამოწყებას, როგორიც ლიტერატურული პრემია "საბაა", ასეთი უგულო დეტალების გამო ჩრდილი მიადგა.