თსუ-ს რექტორობის კანდიდატებს სტუდენტები ხვდებიან - ძირითადი კითხვები მინისტრის ყოფილ მოადგილესთან აქვთ

საზოგადოება - 10:38, 20 Sep, 2016

1394

თბილისის სახელმწიფო უნივერსიტეტის რექტორობის კანდიდატებს სტუდენტები დღეს შეხვდებიან.

კანდიდატებთან შეხვედრას აუდიტორია 115-ის წარმომადგენლები აპირებენ.

ახალგაზრდები არჩევნებში განათლების მინისტრის ყოფილი მოადგილის გია შარვაშიძის მონაწილეობას აპროტესტებენ.

„მოვისმენთ მათ ხედვებს თუ როგორ ხედავენ უნივერსიტეტის განვითარების გზას. ბუნებრივია, გვაქვს კითხვები, განსაკუთრებულ ინტერესს იწვევს ბატონი გიორგი შარვაშიძის კანდიდატურა. მასთან ურთიერთობის გამოცდილებამ გვაჩვენა ის, რომ ის იძლევა დაპირებებს, რომელსაც შემდეგ არ ასრულებს,“ - განაცხადა თსუ-ის სტუდენტური მოძრაობა აუდიტორია 115-ის წევრმა გიორგი არობელიძემ.

შარვაშიძის კანდიდატურა მიუღებლად მიაჩნიათ თვითმმართველობის წარმომადგენლებსაც.

თბილისის სახელმწიფო უნივერსიტეტის რექტორის არჩვენებში სამი კანდიდატი დარეგისტრირდა, ესენი არიან: ფილოსოფოსი გიორგი ბარამიძე, განათლების მინისტრის ყოფილი მოადგილე გია შარვაშიძე და უნივერსიტეტის პროფესორი ცირა ბარამიძე.

რექტორობის მსურველთა განცხადებებს აკადემიური საბჭო განიხილავს და რექტორობის კანდიდატს 23 სექტემბერს აირჩევს.