დღეს ყველასათვის საყვარელი მსახიობის, „საქართველოს ბებიის“- სესილია თაყაიშვილის დაბადების დღეა.

სესილია თაყაიშვილი 1906 წლის 17 სექტემბერს დაიბადა ბათუმში. მის ოჯახში ბევრი გამოჩენილი ადამიანი იკრიბებოდა და პატარა სესილიას სტუმრებთან ყოფნა ძალიან ართობდა. ის გაფაციცებული აკვირდებოდა ყველას ქცევას, მიმიკას, ლაპარაკის მანერას… მერე კი ზუსტად იმეორებდა ნანახსა და გაგონილს. იზეპირებდა ლექსებს, ტექსტებს და ოჯახში სანახაობებსა და საღამოებს მართავდა. მშობლები მიხვდნენ, რომ სესილია მსახიობობის გარდა, სხვა არაფერზე იფიქრებდა...

ასე იქცა სტუმრების გამრთობი პატარა გოგონა დიდ მსახიობად. რამდენადაც დიდი მსახიობი გახლდათ სესილია თაყაიშვილი , იმდენად გამოირჩეოდა უბრალოებით. ეს უბრალოება მნის ანდერძშიც ჩანს.

სესილია თაყაიშვილის ანდერძი:

„ვგრძნობ, ძალიან ცუდად ვარ, არ მცილდება ნახველში სისხლი. უსაშველო ხველა, ვიხრჩვები. რა კარგია, კაცი რომ დიდი სიცხით არის ავად, გრძნობა ეკარგება და კვდება. რა ცუდია, ყველაფერი გტკივა, დადიხარ ძლივს და არ კვდები.

ვთხოვ ჩემიანს ყველას, შემისრულონ თხოვნა. არავითარ შემთხვევაში თეატრში არ გადამიყვანონ, ჩემი არგადაყვანით შეწყდება თეატრში ხშირი სიკვდილი. მერწმუნეთ, არავითარ შემთხვევაში, მუხლმოდრეკილი გეხვეწებით.
დიდუბე არ მიყვარს და გთხოვთ, ნუ გამომიძებნით ადგილს. საბურთალოში თუ შეძლებთ, მაგრამ გთხოვთ ორ ადგილს იმიტომ, რომ ჩემს გვერდით მოხვდება, ვინც ჩემს შემდეგ წავა ოჯახიდან და არ ვიქნები მარტო. იწამეთ თხოვნა.

რა საჭიროა საპატიო ყარაული, ნუ დაღლით ხალხს, არავითარი სიტყვები!

ვიყავი, ვშრომობდი და დასრულდა ჩემი ცხოვრება!

იმედია, ასე მშვიდად და წყნარად მიაბარებთ ჩემს ნეშტს ცივ მიწას”.