ლაშა თორდია ნიკა გვარამიას პასუხობს - მე ბერკეტი არ გამაჩნია, ეს სხვა ორგანოების საკვლევია

საზოგადოება - 15:47, 09 Sep, 2016

3343

ტელეკომპანია „რუსთავი 2“-ის გენერალური დირექტორის მიერ გუშინ გაკეთებულ განცხადებას, რომელიც რ2-ის საქმის მოსამართლეებზე ზეწოლის ფაქტებს ეხებოდა, აუდიტის სამსახურის ხელმძღვანელი ეხმაურება.

ნიკა გავარამია აცხადებს, რომ საქმის განმხილველი კოლეგიის წევრებზე უმძიმესი ზეწოლა ხორციელდება და ამ საქმეში ჩართული არიან უსაფრთხოების სამსახურები.

ლაშა თორდიას განცხადებით, ვანო ზარდიაშვილი მისი მოადგილე აღარ არის, რადგან მან „ქართული ოცნების“ სიაში გადაინაცვლა. გვარამიამ სწორედ ზარდიაშვილი და მიხეილ ჩინჩალაძე დაადანაშაულა უზენაესი სასამართლოს მოსამართლეებზე ზეწოლაში.

"ჩემთვის ცნობილია, რომ მისი მეუღლე უზენაესი სასამართლოს მოადგილეა, ვიცოდი, იმიტომ, რომ ორივეს დიდი ხანია ვიცნობ, თუმცა ის, რომ დანიშვნა იმის გამო მოხდა, რომ შემდეგ ვიღაცაზე ზეწოლა განხორციელდეს, ეს შეუძლებელია. თუ რაღაც მტკიცებულებები მოიპოვება, რომ ვინმე ზეწოლას ახორციელებს, ეს სხვა საქმეა, სხვა ორგანოების საკვლევი, მე არ შემიძლია, ბერკეტი არ მაქვს, რაღაც ფორმით ოპერატიული საქმიანობა განვახორციელო, იყო თუ არა ჩემი მოადგილის მხრიდან რომელიმე მოსამართლეზე ზეწოლა,“- განაცხადა ლაშა თორდიამ.