გერმანიაში მოღვაწე ცნობილი ქართველი მწერალი და ფილოსოფოსი, 89 წლის გივი მარგველაშვილი ნობელის პრემიაზე წარადგინეს.

ამის შესახებ ინფორმაციას ვებგვერდმა artinfo.ge ავრცელებს.

გივი მარგველაშვილი ქართველი ემიგრანტის ტიტე მარგველაშვილის ოჯახში დაიბადა. ტიტე მარგველაშვილი, რომელიც ქართულ სათვისტომოს ხელმძღვანელობდა და დიდი ავტორიტეტით სარგებლობდა ქართველ ემიგრანტებს შორის, 1946 წელს მოტყუებით გადაიყვანეს ბერლინის საბჭოთა საოკუპაციო ზონაში. მას თან ახლდა თავისი ვაჟი, გივი მარგველაშვილი. მამა-შვილი დააპატიმრეს და ზაქსენჰაუზენის „გასაბჭოებულ“ საკონცენტრაციო ბანაკში მოათავსეს. ტიტე მარგველაშვილი დახვრეტილ იქნა, ხოლო გივი მარგველაშვილი საქართველოში ჩამოიყვანეს და ნება დართეს თბილისში თავის ნათესავებთან ეცხოვრა.

გერმანიის დედაქალაქ ბერლინში დაბადებულმა გივი მარგველაშვილმა განათლება თბილისის უცხო ენათა ინსტიტუტში მიიღო. მისი დამთავრების შემდეგ იგი მუშაობდა იქვე გერმანული ენის მასწავლებლად, საქართველოს მეცნიერებათა აკადემიის ფილოსოფიის ინსტიტუტში მეცნიერ თანამშრომლად. მთელი ამ ხნის განმავლობაში გივი მარგველაშვილი წერდა რომანებს, მოთხრობებსა და პიესებს გერმანულ ენაზე, თუმცა არც ერთი მისი ნაწარმოები არ დაბეჭდილა.

მხოლოდ 80-იანი წლების ბოლოს, საბჭოთა კავშირში დაწყებული „პერესტროიკის“ შედეგად, მიეცა საშუალება — პირველად 40-ზე მეტი წლის შემდეგ — კვლავ ჩასულიყო გერმანიის ფედერაციულ რესპუბლიკაში.

სადაც მან გამოაქვეყნა ნაწარმოებები: მრავალტომიანი რომანი „კაპიტანი ვაკუში“, „მუცალი“, „დიდი კორექცია“, „სიცოცხლე ონტოტექსტში“ და სხვ.

გერმანულენოვანი მწერალი გივი მარგველაშვილი ცნობილია, როგორც ფილოსოფოსი და გერმანული ეგზისტენციალიზმის აღიარებული სპეციალისტი. 1997 წელს იგი არჩეულ იქნა თბილისის სახელმწიფო უნივერსიტეტის საპატიო დოქტორად. 2006 წელს მას გოეთეს მედალი მიენიჭა, 2013 წელს კი დაწესდა მისი სახელობის პრემია, რომლის პირველი მფლობელი თავად გივი მარგველაშვილი გახდა.

წყარო: artinfo.ge