ონში, ლიტერატურული კონკურსის გამარჯვებულები გამოვლინდნენ

კულტურა - 14:05, 06 Sep, 2016

1477

ონში, ლიტერატურულ კონკურსში გამარჯვებულების დაჯილდოების ცერემონია გაიმართა.

ორგანიზატორების თქმით, ონში მსგავსი პროექტი პირველად განხორციელდა.

მონაწილეობაზე ასაკობრივი შეზღუდვა არ იყო.

კონკურსანტებს უნდა გაეგზავნათ ერთი, გამოუქვეყნებელი ლექსი, მათი ვინაობა ჟიურისთვის არ იყო ცნობილი.

ჟიურის შემადგენლობა კი, თავიდანვე გამოცხადდა. მათი შემადგენლობა ასეთი იყო: თემურ ჩხეტიანი, ცირა ყურაშვილი, გია არგანაშვილი და ნინო გუგეშაშვილი.

247 ლექსიდან, კრებულისთვის 94 შეირჩა (სიმბოლურად მურმან ლებანიძის დაბადებიდან 94-ე წელს)

ფინალურ ეტაპზე გადავიდა საუკეთესო ქულების მქონე 13 ლექსი, რომელთა ავტორები ორგანიზატორთა ხარჯებით, 3 სექტემბერს მიწვეულნი იყვენენ ონში გამართულ დაჯილდოების საზეიმო ცერემონიალზე.

პირველი ადგილი - სოსო მეშველიანმა დაიკავა, მეორე ადგილი- მანონ ბულისკერიამ, მესამე - ირმა მალაციძემ.

გამარჯვებულებს ფულადი პრიზი - 1000-800-500 ლარი გადაეცათ. გამგეობაში შექმნილმა სპეციალურმა კომისიამ 500 ლარის ოდენობის პრიზი ადგილობრივი პოეტისთვის დააწესა.

მათი რჩეული თამილა ჭიკაძე-ბერიშვილი გახდა.

ონში ასევე მიწვეულნი იყვნენ მურმან ლებანიძის ოჯახის წევრები და მეგობრები.

საზეიმო ღონისძიებას მუსიკალურად აფორმებდნენ "ჩვენებურები" და ანსამბლი "რაჭა“.

ცნობისათვის, ლიტერატურული კონკურსის ჩატარებამდე, ონის მუნიციპალიტეტის გამგეობის მიერ, გამოცხადდა ტენდერი, რომელიც მოიგო ბათუმში რეგისტრირებულმა "ხელოვნებისა და კულტურის ცენტრმა". მისი თავმჯდომარე ზაზა ფირცხალაიშვილი გახლავთ.