,,პური უნდა ხალხს... ნაგვის ურნაში ეძებენ საჭმელს“ - ოზურგეთში უფასო სასადილო ბენეფიციალებს დაკეტილი დახვდათ

საზოგადოება - 18:48, 01 Sep, 2016

3116

ოზურგეთში უპოვართა სასადილოს ბენეფიციარებმა კუთვნილი ულუფის მიღება ვერ მოახერხეს იმ მარტივი მიზეზის გამო, რომ ადგილზე მისულებს კარები დახურული დახვდათ.

როგორც ბენეფიციარები "გურიის მოამბესთან" აცხადებენ, ისინი წინასწარ არავის გაუფრთხილებია და ადგილზე მისულებს ლოდინი დიდხანს მოუწიათ. მოგვიანებით გაიგეს, რომ ტენდერის გამოცხადების გამო უფასო სადადილო დღეს არ იმუშავებდა:

"დღეს მოვედი, მინდოდა კუთვნილი საჭმელი მიმეღო, მაგრამ კარები დახურული დამხვდა. ადგილზეც არავინ იყო, რომ მიზეზი მეკითხა. მას შემდეგ აქ ვდგევარ. ასე როგორ შეიძლება? მერე გავიგეთ, რომ უფროსი შეცვალესო და ამ მიზეზის გამო შესაძლოა საჭმელის მიღება ვერც დღეს, ვერც ხვალ და ვერც ზეგ ვერ მოვახერხოთ."- გვითხრა ერთ-ერთმა ბენეფიციარმა.

"ჩვენი მოთხოვნაა დააბრუნონ ძველი უფროსი, არ გვჭირდება ჩვენ ახალი, ძალიან კარგი კაცია ოლეგი და დაგვიტოვონ ის. რა დროს ტენდერის გამოცხადება და უფროსის შეცვლა იქნებოდა ახლა, ეს რომ არ ექნათ, დღეს საჭმელის გარეშე არ დავრჩებოდით"- გვითხრა მეორე ბენეფიციარმა.

"არ გვაინტერესებს ჩვენ უფროსი, ვინც უნდათ ის დანიშნონ, საჭმელი მოგვცენ რაც მთავარია. ტენდერიც დროულად უნდა გამოაცხადონ, რომ ეს პრობლემა არ შეგვექმნას. არ ვიცით რატომ არაა სასადილო ღია, არავინ არ შეგვხვდა. ავადმყოფი ბავშვი ჰყავს რამდენს, პური უნდა ხალხს, ამით ვარჩენთ რამდენი შვილებს და ვერ მივიღეთ. პური მაინც მიეღოთ და დაერიგებინათ ხალხისთვის, პურის ფული რომ არ აქვს ხალხს, ნაგვის ურნაში ეძებენ საჭმელს. დღესაც ასე უნდა მოვიქცეთ ნეტავ?"- აცხადებდნენ განაწყენებული ბენეფიციარები " გურიის მოამბესთან".

"მზრუნველობამოკლებულთა სასადილოში კვების უზრუნველყოფასთან დაკავშირებულ ტენდერში ამჯერად ახალმა შპს-მ გაიმარჯვა. შპს-ს, კანონის თანახმად, გამარჯვებულის გამოვლენის დღიდან, ხელშეკრულების გასაფორმებლად, ვადად 3 სამუშაო დღე ეძლევა. თუმცა ვინაიდან საქმე ეხება სოციალურად შეჭირვებულ ადამიანებს, ქალაქის მერიის შესაბამისი სამსახური ესაუბრა გამარჯვებულ ფირმას და მოლაპარაკების საფუძველზე ხელშეკრულება ხვალ გაფორმდება და ბენეფიციარებს სასადილოს მომსახურების მიღება ხვალიდანვე შეეძლებათ. ასევე, უნდა აღინიშნოს, რომ ხსენებული ცვლილების შესახებ სასადილოს ბენეფიციარებს იმ დღესვე ეცნობათ. შესაბამისად, ისინი საქმის კურსში იყვნენ, რომ 2 დღის მანძილზე სასადილო არ იმუშავებდა. უკვე ხვალიდან კი ბენეფიციარები სასადილოს სერვისით ჩვეულ რეჟიმში ისარგებლებენ."- გვპასუხობენ ქალაქის მერიაში.

წყარო: გურიის მოამბე