სახალხო დამცველს მისი აპარატის თანამშრომლები უჩივიან. ამის შესახებ ტელეკომპანია "იბერიის" გადაცემა "პრიორიტეტის" პირდაპირ ეთერში ომბუდსმენის აპარატის ყოფილმა თანამშრომელმა ილია ჭანტურიამ ისაუბრა.

„ჩემს მიმართ ორჯერ განხორციელდა დისციპლინური დევნა, პირველს ვერ დავუკავშირებდი იმას, რომ ავტომობილთან დაკავშირებით მოხდა ამ საკითხის გაშუქება, მეორე შემთხვევაში რაღაც კავშირში შეიძლება იყოს, მაგრამ ვერ ვიტყოდი რომ ამიტომ გამიშვა სახალხო დამცველმა სამსახურიდან. უფრო მიმართული იყო იმისკენ, რომ ერთის მხრივ მომხდარიყო ჩემი დასჯა, როგორც ერთ-ერთი დეპარტამენტის უფროსის. სახალხო დამცველი იმდენად უკმაყოფილო იყო ამ თემით, რომ მან მის პირველ მოადგილეს მოსთხოვა თანამდებობის დატოვება. პაატა ბელთაძე თავისი სურვილით არ წასულა“, - განაცხადა ჭანტურიამ.

მან ასევე აღნიშნა, რომ ჰქონდა პაატა ბელთაძესთან საუბარი მის მიერ თანამდებობის დატოვებამდე. როგორც ჭანტურია აცხადებს, უჩა ნანუაშვილმა ბელთაძეს სამსახურის დატოვება მოსთხოვა. რის შემდეგაც ბელთაძემ ერთ თვიანი შვებულება დაწერა და ამის შემდეგ წავიდა სამსახურიდან.

„ჩვენ გვქონდა ეჭვი რომ სახალხო დამცველს ეს ავტომობილი თავისი მოადგილისთვის ნათია კაციტაძისათვის, ამის მიზეზზე კი საზოგადოებამ თავად უნდა გამოიტანოს დასკვნა. თუ ჩვენ რაღაც გადაწყვეტილებების დასაბუთებულობაში გვეპარება ეჭვი, უნდა დავსვათ შესაბამისი კითხვები, როდესაც კითხვები დაისვა, სახალხო დამცველის პასუხი იყო ის, რომ ამ კითხვაზე პასუხი გაცემული იყო“, - დასძენს ჭანტურია.

საუბარია ძვირადღირებულ ავტომობილზე, რომელიც სახალხო დამცველის აპარატმა ტენდერის გარეშე შეიძინა. ავტომობილის ღირებულებამ 105 ათასი ლარი შეადგინა.