ვლადიკავკაზში საქართველოს ოლიმპიური ჩემპიონის ვლადიმერ ხინჩეგაშვილის ბილბორდი გამოფინეს, რომელზეც რიოს ოლიმპიადის გამარჯვებულის ფოტოს თან თვითაღიარებული ხელისუფლების დროშა ახლავს. ფოტოზე ასევე არის წარწერა სადაც, სპორტსმენის გვარის, ხინჩეგაშვილის გვერდით ხინჩეგოვი წერია. ფოტოს "ეხო კავკაზა"-ს ჟურნალისტი ირაკლი ორაგველიძე საკუთარ ფეისბუკ გვერდზე აქვეყნებს. როგორც აღნიშნული ფოტოს კომენტარებში ფეისბუკმომხმარებლები წერენ, აღნიშნული ბილბორდი ვლადიმერ ხინჩეგაშვილის ოსმა ნათესავებმა გამოფინეს. ,,ნიუპოსტის" კორესპონდენტის ცნობით, აღნიშნულ ფაქტს ვლადიმერ ხინჩეგაშვილის მწვრთნელი ნუგზარ სხირელი გამოეხმაურა, რომელიც ამბობს რომ რიოს ოლიმპიადაზე ხინჩეგაშვილი საქართველოს სახელით იბრძოდა და ამ შემთხვევაში მისთვის არ აქვს მნიშვნელობა, თუ რომლეი ქვეყნის წარმომადგენელს ავარჯიშებს. ნუგზარ სხირელი განმარტავს, რომ გორელი ჩემპიონის ახლო ნათესავები საქართველოში ცხოვრობენ და ქართული გვარები აქვთ, შესაბამისად ის ფაქტი, რომ ვლადიკავკაზში საქართველოს ოლიმპიური ჩემპიონის ვლადიმერ ხინჩეგაშვილის ბილბორდი გამოფინეს, ბევრზე არაფერზე მეტყველებს. "ისტორიულად თუ ავიღებთ, ყველა ცნობილი პიროვნება ვისი გვარიც გადაკეთდება ან დამოკლდება ან უფრო გაგრძელდება, ცდილობენ რომ რუსული ინტერპრეტაცია მისცენ, მაგრამ ამას საერთო ჯამში არც გორელებისთვის და არც პირადად ჩემთვის არანაირი მნიშვნელობა არ აქვს. ჩემთვის ეროვნებას არ აქვს მნიშვნელობა. ის არის საქართველოს შვილი და იბრძოდა და იბრძვის საქართველოსათვის. ეს არის მთავარი და რა მნიშვნელობა აქვს ჩრდიოლოეთ კავკასიაში რა გვარზე დაწერენ და რა გვარის ინტერპრეტაციას მოახდენენ, ხვალ შეიძლება ჩეჩნებმა და დაღესტნელებმა ეს გააკეთონ და გადაუკეთონ გვარი და დაწერონ თავის ბილბორდზე, მაგრამ მე გირჩევთ თქვენ რომ დარწმუნებულები იყოთ მის გვარში,არის ლევან მაისურაძის ქართული გვარ სახელები წიგნი, სადაც ჩახედავთ და ნახავთ რა ეროვნების არის კიდე გიმეორებთ, ჩემთვის ეროვნებას მნიშვნელობა არ აქვს. მე მწვრთნელი ვარ ჭიდაობის და ჩემთვის არანაირი მნიშვნელობა არ აქვს რომელი ერის წარმომადგენელს ვავარჯიშებ და მივიყვან იმ კონდიციამდე რა კონდიციამდეც ლადოა"-აცხადებს ნუგზარ სხირელი.