„საქართველოს ახალგაზრდული ევრო-ატლანტიკური კოალიციის“ დაფუძნებიდან ერთი წელი შესრულდა

საზოგადოება - 10:18, 29 Aug, 2016

1389

„საქართველოს ახალგაზრდული ევრო-ატლანტიკური კოალიციის“ დაფუძნებიდან ერთი წელი შესრულდა. კოალიცია 2015 წლის 29 აგვისტოს სამმა არასამთავრობო ორგანიზაციამ, „ევროპულმა ახალგაზრდულმა ცენტრმა“, „საქართველოს მომავალ დიპლომატთა კლუბმა“ და „საქართველოს ახალგაზრდა დიპლომატთა კლუბმა“ დააფუძნეს.

ჯერ კიდევ, 2015 წლის მაისში, არასამთავრობო ორგანიზაცია „ევროპული ახალგაზრდული ცენტრის“ დამფუძნებელმა და ხელმძღვანელმა, გიორგი მამულაშვილმა შესთავაზა არასამთავრობო ორგანიზაციებს შექმნილიყო გაერთიანება, რომელიც ხელს შეუწყობდა ქვეყნის ევრო-ატლანტიკური ინტეგრაციის პროცესს. სწორედ აქტიური კონსულტაციების შემდეგ გადაწყდა „საქართველოს ახალგაზრდული ევრო-ატლანტიკური კოალიციის“, როგორც საზოგადოებრივი მოძრაობის დაფუძნება.

კოალიციის მიზანია, ხელი შეუწყოს ქვეყნის სრულფასოვან ევრო-ატლანტიკურ ინტეგრაციას და ამ პროცესში ახალგაზრდების ჩართულობის გაზრდას. ასევე, მათ ინფორმირებას. გაერთიანება წარმოადგენს კომუნიკაციის ძლიერ მექანიზმს ახალგაზრდულ არასამთავრობო ორგანიზაციათა შორის, რაც ხელს უწყობს მათ ეფექტურ მუშაობას. ამასთან ერთად, კოალიცია მიზნად ისახავს სამოქალაქო საზოგადოების გაძლიერებას.

„საქართველოს ახალგაზრდული ევრო-ატლანტიკური კოალიცია“ აქტიურად თანამშრომლობს სსიპ „ნატოსა და ევროკავშირის შესახებ საინფორმაციო ცენტრთან“, ევროპულ და ევრო-ატლანტიკური ინტეგრაციის საკითხებში სახელმწიფო მინისტრის აპარატთან და საქართველოში აკრედიტირებულ დიპლომატიურ კორპუსთან. კოალიციის კარი ღიაა იმ არასამთავრობო ორგანიზაციათა და დაინტერესებული პირებისთვის, რომლებიც იზიარებენ მის მიზნებსა და ხედვას.

კოალიციის აქტიური ჩართულობით განხორციელდა „ნატო-ს კვირეული“ საქართველოს რეგიონებში. გაიმართა საინფორმაციო შეხვედრები საქართველოს სხვადასხვა სკოლაში. იგეგმება „ევრო-ატლანტიკური საკითხების საგანმანათლებლო ცენტრის“ შექმნა და სტრატეგია „2020“-ის შემუშავება.

დღეს, „საქართველოს ახალგაზრდული ევრო-ატლანტიკური კოალიცია“ ხუთ არასამთავრობო ორგანიზაციას (“ევროპული ახალგაზრდული ცენტრი”, „მომავალ დიპლომატთა კლუბი“, „ახალგაზრდა ექსპერტთა ასოციაცია“, „ევროკლუბი“ და „ევროპულ-ქართული ინსტიტუტი“) აერთიანებს და ის ყველაზე დიდი პროდასავლური ახალგაზრდული გაერთიანებაა ქვეყანაში.