ჰაკერული თავდასხმა NAEC-ის ვებ-გვერდზე? - გამოცდების ეროვნული ცენტრის განმარტება

საზოგადოება - 14:14, 24 Aug, 2016

24441

განათლების ეროვნული ცენტრი სკანდალში გაეხვა. გუშინ, 23 აგვისტოს აბიტურიენტებმა, ცენტრისგან, ერთიანი ეროვნული გამოცდების შედეგების შესახებ ინფორმაცია ვადაზე 2 დღით ადრე მიიღეს. თუმცა, როგორც ირკვევა, ეს საბოლოო შედეგი არ ყოფილა და ახალგაზრდებმა არასრული, დაუმუშავებელი ინფორმაცია მიიღეს. "ნიუპოსტთან" საუბრისას, განათლების ეროვნულ ცენტრში არ გამორიცხეს, რომ შესაძლებელია მონაცემები შეიცვალოს.

ცენტრის წარმომადგენელმა, ეროვნული გამოცდების შედეგების სმს-ით ვადაზე ადრე გავრცელებასთან დაკავშირებით „ნიუპოსტთან“ საუბრისას განმარტა, რომ "NAEC-ის ვებ-გვერდზე ჰაკერული თავდასხმა არ განხორციელებულა და ეს გაუგებრობა მხოლოდ ტექნიკური პრობლემა იყო".

რაც შეეხება უშუალოდ შეფასებისა და გამოცდების ეროვნული ცენტრის ხელმძღვანელის - მაია მიმინოშვილის შეფასებას, რომელსაც აბიტურიენტები და მათი მშობლები აქტიურად ითხოვენ, ცენტრში გვითხრეს, რომ დამატებითი კომენტარი არ გაკეთდება.

გამოცდების ეროვნული ცენტრის პრესსამსახური მედიას სთხოვს, რომ დაეყრდნოს დღეს გავრცელებულ კომენტარს.

„ნიუპოსტი“ ,,ნაეკის” განცხადებას უცვლელად გთავაზობთ:

,,ერთიანი ეროვნული გამოცდების საბოლოო შედეგების (ჩარიცხვებისა და გრანტირების შესახებ ინფორმაცია) გამოქვეყნებამდე სავალდებულოა მონაცემების რამდენიმე ეტაპად შემოწმება. ეს პროცედურა ე.წ. წინასწარი ჩარიცხვების განხორციელებასაც გულისხმობს, რომლის შემდეგ რამდენიმე მიდგომით დასტურდება სისტემაში არსებული ყველა მონაცემისა და შედეგის სიზუსტე.

23 აგვისტოს, საღამოს, ამ პროცესის მიმდინარეობისას, მოკლე ტექსტური შეტყობინების სერვისის გამორთვამდე, აბიტურიენტები, რომლებიც აგზავნიდნენ საკუთარ კოდს ნომერზე 93333, ქულებთან ერთად იღებდნენ იმ მომენტისათვის სისტემაში არსებულ ინფორმაციასაც. ამის გამო მოკლე ტექსტური შეტყობინების სერვისი დროებით გაითიშა და აღდგა გათიშვიდან ერთი საათის შემდეგ. ამ ეტაპზე აბიტურიენტები მხოლოდ თავიანთ შედეგებს იღებენ სმს-თ.

შეფასებისა და გამოცდების ეროვნული ცენტრი ბოდიშს უხდის აბიტურიენტებს სამუშაო პროცესში წარმოქმნილი გაუგებრობის გამო და აცნობებს, რომ ერთიანი ეროვნული გამოცდების საბოლოო შედეგები მონაცემების დამუშავების დასრულებთანავე, სავარაუდოდ, 25 აგვისტოს გამოქვეყნდება”, – აღნიშნულია განცხადებაში.

რაც შეეხება სმს-ბის საფასურს, გამოცდების ეროვნული ცენტრის ცნობით აბიტურიენტებს, რომლებმაც მოკლე ტექსტური შეტყობინება გააგაზავნეს სერვისის გათიშვის პერიოდში, ამ მომსახურების თანხა არ ჩამოეჭრებათ.

,,კიდევ ერთხელ გაცნობებთ, რომ აბიტურიენტებს, რომლებმაც მოკლე ტექსტური შეტყობინება გააგაზავნეს სერვისის გათიშის პერიოდში, ამ მომსახურების თანხა არ ჩამოეჭრებათ. მათ, ვინც სერვისის გათიშვამდე გააგზავნა შეტყობინება, გარდა ქულებისა, მიიღო იმ მომენტისათვის სისტემაში დამატებით არსებული ინფორმაცია და მომსახურების საფასური – 50 თეთრი ჩამოეჭრათ ანგარიშიდან. თუ აბიტურიეტი მიიჩნევს, რომ ქულებთან ერთად დამატებითი ინფორმაციის მიღების გამო ამ საფასურის გადახდა არ არის სამართლიანი, ვთხოვთ, მოგვართოს განცხადებით შეფასებისა და გამოცდების ეროვნულ ცენტრში, მისამართზე: მინდელის N9”- აღნიშნულია განცხადებაში.