"დაუდევრობა, უყურადღებობა, ეს არის იმის ბრალი, ვინც ინსტრუქტაჟს უწევდა"- დაკარგული სამხედროს მამა

საზოგადოება - 11:05, 17 Aug, 2016

8696

გონიოს ყოფილი სასროლეთის საზღვაო ზოლში დაკარგული სამხედროების მშობლები თავდაცვის სამინისტროს თანამშრომლებს უყურადღებობაში ადანაშაულებენ.

“ეს არის დაუდევრობა უყურადღებობა, ეს არის ვინც ინსტრუქტაჟს უწევდა იმის ბრალი, იმის შეცდომის ბრალი. ოდნავ უბრალო შეცდომა და შვილი დამიღუპეს და რა დღეში ჩამაგდეს, გამამწარეს. ჩემმა შვილმა ცურვა იცოდა უმაღლეს დონეზე, პირველი იყო, იმას არაფერი არ შეეშლებოდა. გაიყვანეს სიღრმეში მიატოვეს უყურადღებოდ, ან ჟანგბადი დაელიათ, ან ბავშვს რაღაცამ უმტყუნა. რომ უმტყუნა იქ არ უნდა ყოფილიყო მაშველი ან რაღაცა უბრალო ნავიც არ უნდა ყოფილიყო?“ - აცხადებს ერთ-ერთი დაკარგული სამხედროს იაგო შარაძის მამამ რომან შარაძემ.

დაკარგულის ოჯახის წევრები აცხადებენ, რომ 6 ბალიანი შტორმის დროს სამხედროები წვრთნაზე არ უნდა გაეშვათ.

“გათვალისწინებული უნდა ყოფილიყო, ეს 6 ბალიანი ღელვა იყო ზღვისა. არ უნდა გაეშვა სამსახურს წვრთნაზე, მაგრამ მათი მოვალეობა რაც აკისრიათ ალბათ შეასრულებენ ოჯახის მიმართ. უნდა მოიძებნოს დაღუპული, უნდა პატრონს ჩაბარდეს,"- განაცხადა დაკარგული სამხედროს დეიდამ ნუნუ მჟავანაძემ.

თავადაცვის სამინისტროს ინფორმაციით, სპეციალური ოპერაციების ძალების ორი სამხედრო მოსამსახურე - კაპრალი იაგო შარაძე და I კლასის რიგითი გიორგი ნანეტაშვილი, რომლებიც მებრძოლ-მყვინთავთა კურსს გადიოდნენ, შავ ზღვაზე გეგმიურ საზღვაო სპეცდანიშნულების სწავლებაში მონაწილეობდნენ.

საწვრთნელი ვარჯიშის დროს, ზღვაში სიღმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.

მომხდართან დაკავშირებით ასევე დაწყებულია გამოძიება.
სამძებრო ღონისძიებებში კი დღე დილიდან აშშ-ს თავდაცვის დეპარტამენტის სამხედრო ძალები ჩაერთო