"უფლება არ მქონდა, არ მომეგო რუსისთვის"- შავდათუაშვილის პირველი კომენტარი რიოში გამარჯვების შემდეგ (ვიდეო)

სპორტი - 10:13, 09 Aug, 2016

13992

ქართველი ძიუდოისტი ლაშა შავდათუაშვილი ოლიმპიადის პრიზიორი მეორედ გახდა. ლონდონის ოლიმპიადაზე 2012 წელს მოპოვებული ოქროს შემდეგ, შავდათუაშვილმა რიოს ოლიმპიადაზე ბრინჯაოს მედალი მოიპოვა.

ძიუდოისტმა ლაშა შავდათუაშვილმა (-73 კგ) მესამე ადგილისთვის შეხვედრაში ისრაელის წარმომადგენელ საგი მუკის იპონით სძლია და კარიერაში მეორე ოლიმპიურ მედალს დაეუფლა.საპრიზო ადგილისთვის ბრძოლამდე ყველაზე ემოციური ორთაბრძოლა, კარალეთელმა სპორტსმენმა რუს დენის იარცევს მოუგო.
ოლიმპიური ბრინჯაოს მფლობელთან პირველი ინტერვიუს MySports.Ge-მ ჩაწერა
ლაშა შავდათუაშვილი: "ძალიან დიდი სიხარულია,როდესაც შეგიძლია შენი პატარა წვლილი შეიტანო ქვეყნისთვის კარგ საქმეში და რამდენიმე წამით მაინც დაავიწყო პრობლემები, შენს გულშემატკივრებს. რუსთან შეხვედრის დროს დაძაბული ვიყავი, ვფიქრობდი, რომ უფლება არ მქონდა არ მომეგო რუსისთვის, იქიდან გამომდინარე,რომ ძალიან ბევრი ქართველი დაიღუპა რუსეთ-საქართველოს ბრძოლაში. მე არ მქონდა უფლება დღეს სხვანაირად გამოვსულიყავი ამ ბრძოლაში. წონა შევიცვალე ლონდონის ოლიმპიადის შემდეგ და ყოველთვის რთულია ახალ წონაში წარმატებით გამოსვლა. მაგრამ დიდი შრომის ხარჯზე შევძელი. რა თქმა უნდა მსურდა ოქროს მედალი, მაგრამ ოლიმპიურ თამაშებზე ნებისმიერი მედლის მოპოვება ნამდვილად დიდი წარმატებაა. ეს გამარჯვება მთელს ქვეყანას მინდა მივუძღვნა".
წყარო: mysports.ge