"მკვლელობის მერე გასვენებაშიც იყო..." - დედა-შვილის მკვლელობის დეტალები, ბრალდებული ოჯახის მეგობარია

კრიმინალი - 12:42, 27 Jul, 2016

74180

ფონიჭალაში მომხდარი დედა შვილის მკვლელობა გახსნილია. როგორც მოკლულის მეუღლე ოთარ მამფორია აცხადებს, გიორგი ხაბელაშვილი, რომელიც ქალისა და მცირეწლოვანი ბავშვის მკვლელობაშია ბრალდებული, ოჯახის ახლობელი იყო. მისივე თქმით, ხაბელაშვილს ჰქონდა ინფორმაცია, რომ სახლში ფული ინახებოდა.

„იცოდა რომ ფულს ვაგროვებდი ბინა გაფორმებული არ მაქვს და იცოდა, რომ ბინის ყიდვას ვაპირებდი, თვითონ სხვას უთხრა, შენ ხომ არ შეხვალ და გამოიტანო, მე ყველანაირად მიცნობენო. იმის მერე აქ იყო, გასვენებაშიც. ადვოკატთანაც მახლდა, აქაც იყო, არვიცი გაგიჟებას ვარ, არანაირი ეჭვი არ გამჩენია. იმის მერე ჩასულა სახლში და ერთ საათში ამოვიდა. ღამე პოლიციაში იყო იქაც დაკითხეს და შემდეგ გამომძიებელმა რომ მითხრა, იქაც ვუთხარი, ჩვეულებრივად დაიბარეს. ყველაფერს როგორ გაუძლო არ ვიცი. დადიოდა აქ, სურათებისთვის შეუხედავს, მაგას გული არ ქონია“- აღნიშნა ოთარ მამფორიამ

„კარგი ურთიერთობა ქონდა ყველასთან, გასვენებაშიც იყო და გასვენების შემდეგ ამათთანაც უერთიერთობდა და ნონასა და მარიამის შესანდობარს სვამდა, ამათთან იჯდა და სვამდა სუფრაზე აი, ასეთი ადამიანი“- განაცხდა ოჯახის ახლობელმა.

შეგახსნებთ, რომ მომხდარზე გამოძიება 109-ე დამამძიმებელ გარემოებებში ჩადენილი განზრახ მკვლელობის მუხლით მიმდინარეობს, არც 16-დან 20 წლამდე ან უვადო თავისუფლების აღკვეთას ითვალისწინებს.

ფოტოზე - გარდაცვლილი დედა-შვილი და მკვლელობაში ბრალდებული გიორგი ხაბელაშვილი.

შს სამინისტროს ცნობით, მიმდინარე წლის 22 თებერვალს, თბილისში, ზემო ფონიჭალაში, 1972 წელს დაბადებული ნონა რომანიძისა და მისი მცირეწლოვანი შვილის - მარიამ მამფორიას სასტიკი მკვლელობის საქმეზე შინაგან საქმეთა სამინისტროში გამოძიება თვეების განმავლობაში ინტენსიურად მიმდინარეობდა.

ამ უმძიმესი დანაშაულის გახსნის მიზნით, განხორციელდა არაერთი საგამოძიებო ოპერატიული ღონისძიება. აღებული იქნა რამდენიმე ასეული ნიმუში საექსპერტო კვლევებისთვის. ჩატარდა ათეულობით ექსპერტიზა, მათ შორის, ბალისტიკური, ტრასოლოგიური, დაქტილოსკოპიური, ფიზიკო-ტექნიკური, ქიმიური, სახანძრო-ტექნიკური და სხვა. მოწმის სახით დაიკითხა ასეულობით პირი თბილისსა და საქართველოს სხვადასხვა რეგიონში. შესწავლილი და დამუშავებული იქნა გამოძიების მიმდინარეობისას წარმოშობილი სხვადასხვა ვერსია.

შედეგად, შინაგან საქმეთა სამინისტრომ ზემო ფონიჭალაში მომხდარი მკვლელობის ფაქტი გახსნა.

თბილისის პოლიციის დეპარტამენტისა და თბილისის პროკურატურის თანამშრომლებმა, ერთობლივად ჩატარებული გადაუდებელი ოპერატიულ-სამძებრო და საგამოძიებო ღონისძიებების შედეგად, ორი ან მეტი პირის, მათ შორის, მცირეწლოვნის, დამამძიმებელ გარემოებებში განზრახ მკვლელობის ბრალდებით, 1989 წელს დაბადებული, წარსულში ქურდობის, ყაჩაღობისა და განზრახ მკვლელობის მცდელობისთვის ნასამართლევი გიორგი ხ. თბილისში დააკავეს.

გამოძიებამ დაადგინა, რომ გიორგი ხ.-მ მიმდინარე წლის 22 თებერვალს, დილით, თბილისში, ზემო ფონიჭალაში, საკუთარ საცხოვრებელ ბინაში, ცივი იარაღით 29 ჭრილობის მიყენების შედეგად, მოკლა 1972 წელს დაბადებული ნონა რომანიძე და 16 ჭრილობის მიყენების გზით - მისი მცირეწლოვანი შვილი, მარიამ მამფორია, რის შემდეგაც, კვალის დაფარვის მიზნით, ბინაში ხანძარი გააჩინა და შემთხვევის ადგილიდან მიიმალა.

პოლიციამ დანაშაულის ჩადენის იარაღი - დანა ნივთმტკიცების სახით ამოიღო. დანაშაულის ჩადენის იარაღსა და შემთხვევის ადგილზე ნაპოვნ სხვადასხვა ნივთზე დაკავებულის გენეტიკური პროფილის კვალი აღმოჩნდა.

გამოძიება დამამძიმებელ გარემოებაში ორი პირის და, მათ შორის, მცირეწლოვნის, განზრახ მკვლელობის ფაქტზე მიმდინარეობს (საქართველოს სსკ-ის 109-ე მუხლის მე-3 ნაწილით, რაც 16-დან 20 წლამდე ან უვადო პატიმრობას ითვალისწინებს)."- განაცხადეს უწყებაში გამართულ ბრიფინგზე.