ოზურგეთში შუა პარკში საავტომობილო გზა გაჰყავთ

საზოგადოება - 12:25, 25 Jul, 2016

2054

ოზურგეთში, ყოფილი პოლიციის შენობის წინ მდებარე პარკი, რომლის რეკონსტრუქციაც 2006 წელს განხორციელდა, მოქმედი ხელისუფლების გადაწყვეტილებით შუაზე გაიყოფა.
შუაზე გაჭრილ პარკში კი საავტომობილო გზა დაიგება.
სამუშაოები უკვე დაწყებულია, საავტომობილო გზისთვის განკუთვნილი ტერიტორია მძიმე ტექნიკამ უკვე გაწმინდა და გაასწორა, მალევე დაიწყება მოასფალტება.
ოზურგეთის მუნიციპალიტეტის საკრებულოს თავმჯდომარემ, გელა კობალაძემ „გურიის მოამბესთან“ საუბარში აღნიშნა, აღნიშნული სამუშაოები ქალაქში საავტომობილო მოძრაობის განტვირთვის მიზნით ხორციელდება.
გზა პარკის იმ ნაწილში გაიჭრა, რომელსაც ორი წლის წინ ყვავილებით მოვაჭრეები სარგებლობდნენ.
ჩვენს მიერ მოპოვებული ინფორმაციით, ახალი პროექტის შესაბამისად, გაბრიელ ეპისკოპოსის ქუჩის საავტომობილო გზა გაგრძელდება (აღნიშნულ ქუჩაზე მდებარეობს რესტორანი „ქალაქური“, „ელეგანტი“, სავაჭრო ობიექტები) გადაკვეთს გიორგი ჭანტურიას ქუჩას და აპოლონ წულაძის ქუჩას შეერთდება, სადაც ყოფილი პოლიციის შენობა მდებარეობს, სადაც ტოტალიზატორი, საფინანსო და სხვადასხვა სავაჭრო ორგანიზაციებია განთავსებული.
რაც შეეხება საავტომობილო მოძრაობას, ახალი პროექტის მიხედვით, ა. წულაძის ქუჩაზე მოძრაობა ცალმხრივი გახდება, იქ ავტომანქანით შესვლა მხოლოდ გ. ეპისკოპოსისა და გ. ჭანტურიას ქუჩებიდან იქნება შესაძლებელი. მოძრაობა იქნება აბაშიძის ქუჩიდანაც.
ოზურგეთის ძველი, აგრარული ბაზრისკენ მიმავალ გზაზე კი, სატრანსპორტო მოძრაობა მხოლოდ ოზურგეთის სავაჭრო ცენტრის, ე.წ ახალი უნივერმაღის გზიდან იქნება შესაძლებელი, სადაც ადრე მოძრაობა აბაშიძის ქუჩიდანაც თავისუფალი იყო. ახალი გზის დასრულების შემდეგ კი აღნიშნული ქუჩიდან მოძრაობა აიკრძალება.
სამუშაოების დასრულების შემდეგ, აბაშიძის ქუჩიდან პარკისკენ მოძრავი ტრანსპორტი, მხოლოდ აპოლონ წულაძის ქუჩით ისარგებლებს.
ამ ეტაპისთვის გაურკვეველია დატოვებენ თუ არა პარკში, კრიმინალთან ბრძოლაში დაღუპულთა მემორიალსა და ყოფილი პოლიციის უფროსის, იური სიორიძის ბიუსტს.
როგორც მერიის პრესსამსახურში გვითხრეს, აღნიშნულზე კომენტარს ჩვენთან ქალაქის მერი ხვალ გააკეთებს.