ამ წუთებში აქცია მიმდინარეობს ლანჩხუთის მუნიციპალიტეტის სოფელ ნიგოითში.
ადგილობრივები სოფლის გაზიფიცირებას ითხოვენ. სოფლის ცენტრში შეკრებილები აცხადებენ, რომ თუ ნიგოითში უახლოეს დღეებში არ დაიწყებენ გაზიფიცირების სამუშაოებს, ისინი ცენტრალურ მაგისტრალს გადაკეტავენ: "შუხუთში მანამ არ დაიწყეს ბუნებრივი აირის შეყვანა, სანამ მოსახლეობამ საპროტესტო აქციები არ დაიწყო. ალბათ სხვანაირად ვერ იგებს ჩვენს მოთხოვნებს ხელისუფლება. იქ შეიყვანეს ბუნებრივი აირი, მილები ჩვენი სოფლის საზღვრამდე მოიყვანეს და შეწყვიტეს სამუშაოები. ჩვენ არ ვართ ხალხი? არ გვჭირდება ყურადღება? ავდგებით ახლა ჩვენც და გადავკეტავთ ცენტრალურ მაგისტრალს, მანამ არ გავჩერდებით, სანამ არ დაიწყება სამუშაოები"-აცხადებენ აქციაზე შეკრებილები.
"გურიის მოამბეს" ესაუბრა ნიგოითის ადმინისტრაციული ერთეულის წარმომადგენელი, რწმუნებულის ერთ-ერთი თანაშემწე, გიგა დოლიძე. მისი თქმით, მოსახლეობის პროტესტი სამართლიანია, რადგან თუ მოსაზღვრე სოფლის გაზიფიკაცია მოხდა, მოსაზღვრე სოფელი არ უნდა დაეტოვებინათ: "მოსახლეობის პროტესტი არის საფუძვლიანი. ნიგოითი შუხუთის მოსაზღვრე სოფელია, მიიყვანეს მილები საზღვრამდე და შეაჩერეს სამუშაოები. ამბობენ, 2017 წელს არის პროექტში ჩასმულიო. ახლა ეს ხალხი ითხოვს, რომ თუ აქაც სასწრაფოდ არ დაიწყება გაზიფიცირება, გადაკეტავენ გზას. როგორც ეს შუხუთში მოხდა"-გვითხრა დოლიძემ.
"გურიის მოამბესთან" კომენტარს აკეთებს ლანჩხუთის საკრებულოს დეპუტატი "ნაციონალური მოძრაობიდან" კახა ასკურავა, რომელიც ასევე აღნიშნული სოფლის მცხოვრებია:
"რაც კი საკრებულოში შევედი, იმ დღიდან ვსაუბრობ ნიგოითის გაზიფიცირებაზე. საკრებულოს სხდომას რა ჩაუვლია, ეს საკითხი არ მეხსენებინოს, ვერც ერთხელ ვერ მივიღე კონკრეტული პასუხი, სანაცვლოდ საუბარი იყო აცანა-მამათზე, მაგრამ როგორც აღმოჩნდა, არც ამ სოფლების გაზიფიცირება განიხილება. ყოველ შემთხვევაში, იქ სამუშაოები ამ ეტაპზეც კი დაწყებული არ არის. რაც შეეხება შუხუთს, იქ ჩვენი ხელისუფლების დროს იყო პროექტი გამზადებული. ატყუებენ ახლა ნიგოითის მოსახლეობას 2017 წელს დაიწყება სოფლის გაზიფიცირებაო, 2017 წლამდე მინიმუმ დაპროექტება უნდა დაიწყოს უკვე და ესეც არ კეთდება. თან, ესენი ამ დროს ხელისუფლებაში არ იქნებიან, მერე ისევ ჩვენი მისახედი იქნება ეს სოფლები. ეს არის კლასიკური მაგალითი რეგიონებში გაჩერებული ინფრასტრუქტურის"-გვითხრა კახა ასკურავამ.
ამ წუთებში ადგილზე იმყოფება მხოლოდ სოფლის ხელმძღვანელობა, გამგეობიდან იქ ჯერ არავინ გამოჩენილა.