ცხენების ქურდობა თბილისში - „რაიდმედს“ ბავშვთა რეაბილიტაციისთვის საჭირო ცხენები მოპარეს

კრიმინალი - 12:54, 15 Jul, 2016

3266

სამკურნალო დიაგნოსტიკურ ცენტრ „რაიდმედს“ ორი ცხენი მოპარეს. ცენტრის წარმომადგენლების ინფორმაციით, ცხენები ლისის ტბაზე მდებარე საცხენოსნო დაწესებულებიდან სავარაუდოდ, გუშინ გვიან ღამით მოიპარეს.

აღსანიშნავია, რომ საცხენოსნო დაწესებულებაში აუტიზმის, ცერებრალური დაავადებისა და ოსტეოქონდროზის მქონე ბავშვებს გამაჯანსაღებელი პროცედურები უტარდებათ.

"ეს ცხენები სპეციალურად გაწვრთნილები და დამჯერები არიან, "რაიდმედიისთვის" და სპეციალური საჭიროების მქონე პაციენტებისთვის, ეს ძალიან დიდი დანაკლისია, რადგან ბავშვებს გამაჯანსაღებელი პროცედურები სწორედ ამ ცხენების საშუალებით უტარდებათ. როგორც იტყვიან, ერთ-ერთ დაკარგულ ცხენზე იდგა მთელი კლინიკა, რადგან ზომითაც დიდი იყო და დიდი ზომის ბავშვებს უკეთ ემსახურებოდა"- განუცხადა "ნიუპოსტს" „რაიდმედის“ მენეჯერმა.

ელენე ხუხიას თქმით, საპატრულო პოლიციამ ტერიტორია უკვე დაათვალიერა და თანამშრომლები გამოკითხა.

ცენტრის წარმომადგენლების განცხადებით, ცხენების დაკარგვის შესახებ ინფორმაცია გუშინ გვიან ღამით შეიტყვეს.

"რაიდმედში" ვარაუდობენ, რომ სპეციალურად გაწვრთნილი ცხენები გამიზნულად მოიპარეს.

"სათვალთვალო კამერებით აღჭურვილია მხოლოდ ცენტრის ტერიტორია, სადაც უშუალოდ რეაბილიტაცია მიმდინარეობს. სამწუხაროდ, ეს ცხენები დამბული გვყავდა კილინიკის მიმდებარედ, შემოღობილ ტერიტორიაზე, სხვა ცხენებთან ერთად. გამთენიისას, როცა ჩვენმა თანამშრომელმა, მოიკითხა ცხენები, ორი მათგანი ადგილზე აღარ იყო. თოკები გადაჭრილი დახვდა, როგორც ჩანს, ეს ცხენები სპეციალურად შეარჩიეს. იმედს ვიტოვებთ, რომ ცხენებს უახლოეს პერიოდში იპოვიან"- აღნიშნა ხუხიამ.

დავით ჯაბაშვილი