ტელეკომპანია „რუსთავი 2“-ის გენერალურმა დირექტორმა დღეს გამართულ ბრიფინგზე ტელეკომპანია „რუსთავი 2“-ის საქმეზე ისაუბრა და საკასაციო სასამართლოს მოსამართლეებს მიმართა. გვარამიამ სასამართლოს კანონიერი გადაწყვეტილების მიღებისკენ მოუწოდა:

„ჩვენ შევიკრიბეთ იმისათვის, რომ მივმართოთ საქართველოს უზენაეს სასამართლოს, ჩვენ გუშინ ფოსტის მეშვეობით ჩავაბარეთ საკასაციო საჩივარი, სრული რწმენით იმისა, რომ ორი ინსტანციის გადაწყვეტილება არის უკანონო, დაუსაბუთებელი და არაფერი აქვს საერთო სამართლიან სასამართლოსთან, ყველა საპროცესო უფლება იყო დარღვეული, ამის დამამტკიცებელი იყო ორივე ინსტანციის გადაწყვეტილება, ეს უკანონობა არის უპრეცენდენტო, რაც აკმაყოფილებს საკასაციო საჩივრის დასაშვებობის კანონით გათვალისწინებულ კრიტერიუმებს. უზენაეს სასამართლოს მოვუწოდებთ ნუ გახდება დაკვეთის შემსრულებელი, გადაარჩინოს დემოკრატია, გადაარჩინოს მართლმსაჯულების რეპუტაცია, რომელიც მიწასთან გაასწორა პირველმა ორმა ინსტანციამ. საკასაციო ინსტაციაში ჩვენი შეტანილი სარჩელი ემყარება ოთხივე კრიტერიუმის დასაშვებობას. უმნიშვნელოვანესია, რომ მინიმალური ბარიერი მაინც დავძლიოთ, რათა უზენაესმა სასამართლომ ის არ გვითხრას, რომ საერთოდ განხილვის ღირსიც არ არის ჩვენი საჩივარი.

თქვენ დღეს წყვეტთ ამ ქვეყანაში დემოკრატიის ბედს, სიტყვისა და გამოხატვის თავისუფლების ბედს, ასევე საქართველოში სამოქალაქო მშვიდობის ბედს. ყველა პროცესი რომელიც პროვოცირებული იქნება თქვენი უკანონო გადაწყვეტილებით, იქნება თქვენს სინდისზე და თქვენს სისხლის სამართლებრივ საკითხზე. ნუ შეუერთდებით თქვენს იმ კოლეგებს, ვინც დაასამარა მართლმსაჯულება, ნუ შეუერთდებით მათ რიგებს და ნუ გაიზიარებთ მათ ბედს. თქვენი გადაწყვეტილება არის მნიშვნელოვანი, რადგან თქვენი სიტყვა არის საბოლოო. თქვენი გადაწყვეტილება შეიძლება დრამატულად გადამწყვეტი აღმოჩნდეს ამ საქმისთვის. თქვენ ხართ მოსამართლეები და არაფერი და არავინ თქვენს ზემოთ ამ ქვეყანაში არ არის და არავის არ აქვს ბერკეტები თქვენზე. მივმართავ მოსამართლეებს, თქვენ წერთ დღეს საქართველოს ისტორიას, თქვენი გადაწყვეტილების ფურცლებით დაიწერება ისტორია, ქალბატონო მზია თოდუა, ჩვენ არ გენდობით, თქვენ იყავით ქართუს იურიდიული დეპარტამენტის ხელმძღვანელი, ნუ განიხილავთ ამ საქმეს და აიცილეთ. ამ კოლეგიის 6 მოსამართლეა სულ, კოლეგიიდან 4 მოსამართლე ახალი ხელისუფლების მიერ არის დანიშნული, საქართელოს პრეზიდენტის პასუხისმგებლობაც დგას. იმ შემთხვევაში თუ ეს მსოამართლეები ღრმად იქნებიან შემსრულებლები ბრძანების, მაშნ ჩვენ უნდა მოვისმინოთ ახსნა-განმარტება პრეზიდენტისგან, რა კრიტერიუმებით იქნენ ისინი შერჩეულნი. კანონგარეშე დარჩენილები ჩვენ დავიცავთ ჩვენს უფლებებს და თავისუფლებებს საერთაშორისო სტანდარტით გათვალისწინებული ყველა უფლებით, რომელიც სახელმწიფომ არ მოგვცა. ჩვენ ავირჩიეთ სამართლებრივი გზა, სამწუხაროდ ამ გზამ სიმართლის დადგენამდე არ მიგვიშვა. ბოლო ინსტანციაც თუ იმავეს აკეთებს, ჩვენ არაფერი დაგვრჩენია გარდა იმისა, რომ აღვადგინოთ სამართლიანობა ფართო საზოაგდეობის ჩარევით. ჩვენ არ ვაპირებთ ჩვენი აწმყოს და ჩვენი შვილების მომავლის დაღუპვას. “, - განაცხადა ნიკა გვარამიამ.