თბილისში სექტემბრიდან ახალი ევროსტანდარტების შესაბამისი ავტობუსები ივლის. შესაბამის ხელშეკრულებას თბილისის მერიასა და გერმანულ საავტომობილო კომპანია Man Truck and Bus AG-ს შორის დღეს სასტუმრო „რედისონ ბლუ ივერიაში“ მოეწერა ხელი. ხელმოწერის ცერემონიას ფინანსთა მინისტრის მოადგილე, დავით ლეჟავა დაესწრო.

პროექტი მთლიანად ევროპის რეკონსტრუქციისა და განვითარების ბანკის (EBRD) ფინანსური მხარდაჭერით ხორციელდება. გამარჯვებული სატრანსპორტო კომპანიის შერჩევა ტენდერის მეშვეობით სწორედ EBRD-ის საერთაშორისო წესების შესაბამისად განხორციელდა.

თბილისის მერიას ავტობუსების პარკის განახლების 4-წლიანი გეგმა გააჩნია. აღნიშნული პროცესი ეტაპობრივად ხორციელდება და ითვალისწინებს ეკოლოგიურად სუფთა და ადაპტირებული ავტობუსებით პარკის სრულად განახლებას.