37 წლის ქალი და მისი სამი შვილი მეზობელმა მოკლა? - ვაჩიანის ტრაგედიის ახალი დეტალები

კრიმინალი - 19:45, 11 Jul, 2016

14251

შინაგან საქმეთა სამინისტროს ინფორმაციით, ვაჩიანში 37 წლის ქალი და მისი სამი შვილი 24 წლის მამაკაცმა მოკლა. უწყების ცნობით, შსს-მ ვაჩიანში მომხდარი მკვლელობის ფაქტი გახსნა ბრალდებული დაკავებულია და აღიარებს დანაშაულს.

უწყება შემზარავი მკვლელობის მოტივად ქურდობას ასახელებს.

მოკლული ქალის ახლობლები აცხადებენ, რომ დაკავებული გარდაცვლილების გვერდით ცოლთან და შვილებთან ერთად ცხოვრობს.

მეზობელები ნოდარ ა - ს მშვიდ ადამიანად ახასიათებენ. გარდაცვლილთა ოჯახის წევრები კი ვარაუდობენ, რომ დაკავებულს თანამზრახველი ჰყავდა.

"ამ შემზარავ დანაშაულს, 24 წლის ახალგაზრდა მარტო ვერ ჩაიდენდა, 4 ადამიანი მარტომ აწამა? ამ ვერსიის არ გვჯერა"- აცხადებენ მეზობლები.

ახალქალაქის რაიონის სოფელ ვაჩიანში 37 წლის ქალისა და მისი სამი შვილის ცხედრები მეზობლებმა იპოვეს. ბავშვების ასაკი 5, 16 და 18 წელია. სახლში შვილებთან ერთად მხოლოდ ქალი ცხოვრობდა, მისი მეუღლე კი, საზღვარგარეთ სამუშაოდ იმყოფება.

დედასა და უფროს გოგონებს, სავარაუდოდ, თავის არეში აქვთ ბლაგვი საგნით სასიკვდილო ჭრილობები მიყენებული. უმცროსი, 5 წლის ბიჭი კი გაგუდულია. მთელი ღამის განმავლობაში ადგილზე ექსპერტ-კრიმინალისტები მუშაობდნენ.