„მესმის ყველასი, ვინც აღშფოთდა, უბრალოდ, ასე მოხდა. თუმცა, მე იქ ჩემი სათქმელი ვთქვი“-გიგი დედალამაზიშვილის პასუხი განაწყენებულ მსმენელს

საზოგადოება - 13:08, 11 Jul, 2016

32379

ჯგუფი „მგზავრების“ სოლისტი გიგი დედალამაზიშვილი ჟურნალ „თბილისელებთან“ საუბრისას კომენტარს აკეთებს 9 აპრილს, ჯგუფის მიერ რუსეთში გამართულ კონცერტზე, რამაც ძალიან დიდი აგრესია და განაწყენება გამოიწვია ქართველი ხალხის მხრიდან. ასევე აღიარებს იმას, რომ ყველაზე მეტად ქართველი მსმენელის ნდობისა და სიყვარულის მოპოვებაა.

გიგი დედალამაზიშვილი: საქართველოში ნამდვილად რთულია მსმენელის ნდობის მოპოვება, მაგრამ თუ ამას დაიმსახურებ, მერე ძალიან შეგიყვარებენ. იმიტომ რომ, ქართველები ძალიან გულწრფელები არიან, თუ არ მოსწონთ, ტაშს არ დაგიკრავენ. სხვა მხრივ, ყველა ქვეყნის მაყურებელი ერთნაირია იმ თვალსაზრისით, რომ შენგან მაქსიმალურს მოითხოვენ. თუ დაინახეს, რომ ბოლომდე იხარჯები და შენს საქმეს აკეთებ, აუცილებლად დაგიკრავენ ტაშს. კონკრეტულად, რომელიმე ქვეყნის გამორჩევა რთულია. პრინციპში, მე მაყურებლის რეაგირების მიხედვით კი არა, უპირველესად, ჩემი თავისგან ვითხოვ საქმის კარგად კეთებას. თუ ამას შევძლებ, დარწმუნებული ვარ, მაყურებელი დააფასებს.

– 9 აპრილის ამბებზეც მინდა გკითხოთ. საქართველოს დამოუკიდებლობის დღეს, რუსეთში გამართულმა კონცერტმა საზოგადოების ნაწილის კრიტიკა დაიმსახურა. თუმცა, შენ მიერ სცენაზე ნათქვამმა სიტყვამ საქართველოს დამოუკიდებლობის შესახებ; ის წუთიერი პატივი, რომელიც მაყურებელმა 9 აპრილს გარდაცვლილ ადამიანებს შენივე თხოვნით მიაგო და მაყურებლებში აფრიალებული ქართული დროშა, ძალიან ემოციური იყო.

– პრინციპში, მე ჩემი სათქმელი სცენაზე ვთქვი. მესმის ყველასი, ვინც აღშფოთდა, უბრალოდ, ასე მოხდა. თუმცა, მე იქ ჩემი სათქმელი ვთქვი. რამის დამატება არ მინდა, იმიტომ რომ, ეს ჩემთვის ძალიან რთული იყო და არის ემოციურად. უბრალოდ, მინდა, ყველას ვუთხრა, რომ ძალიან მიყვარს საქართველოში მცხოვრები თითოეული ადამიანი და მესმის მათი.