გიორგი აბაშიშვილი წიგნი-ალბომის „ქართული ფოლკლორის საგანძური, ფოლკლორული ანსამბლები“ პრეზენტაციას დაესწრო

საზოგადოება - 20:58, 08 Jul, 2016

2137

საქართველოს პრეზიდენტის ადმინისტრაციის უფროსი გიორგი აბაშიშვილი და პრეზიდენტის პოლიტიკური მდივანი ფიქრია ჩიხრაძე დღეს „ქართული ფოლკლორის საგანძური, ფოლკლორული ანსამბლები“ წიგნი-ალბომის პრეზენტაციას დაესწრნენ, რომელიც საქართველოს პრეზიდენტის სარეზერვო ფონდის დაფინანსებით გამოიცა.

ალბომი „ფოლკლორის ეროვნული ფონდის“ პროექტის ფარგლებში გამოიცა და მისი მიზანი ქართული ხალხური სიმღერისა და ცეკვის ტრადიციული შემსრულებლობის პოპულარიზაციაა.

პრეზიდენტის ადმინისტრაციის უფროსმა გიორგი აბაშიშვილმა მადლობა გადაუხადა ფონდის წარმომადგენელს გიორგი უშიკიშვილს გაწეული სამუშაოსათვის და აღნიშნა, რომ განხორციელებული პროექტი ხელს შეუწყობს ქართული ფოლკლორის პოპულარიზაციას არა მხოლოდ საქართველოში, არამედ, მის ფარგლებს გარეთაც, პრეზიდენტის სარეზერვო ფონდიდან მისი დაფინანსება კი, კიდევ ერთხელ უსვამს ხაზს ხალხური შემოქმედებისადმი სახელმწიფოებრივ მიდგომას.

წიგნი-ალბომის პრეზენტაცია ზაქარია ფალიაშვილის სახელობის თბილისის ოპერისა და ბალეტის სახელმწიფო თეატრის წითელ დარბაზში გაიმართა და მას ასევე ესწრებოდნენ ადმინისტრაციის სამდივნოს უფროსი გიორგი ჟურული და ადმინისტრაციის სხვა წარმომადგენლები.